Ungma Baptist Arogo lanurtem sports ministry tenzükogo

Mokokchung, March 27 (TYO): Tanü alima ainba den liromedema yimya balala agi tanela renlokba maparen nunga aintsü tenüngdaktsü ta tangatetba nung “Go Sports” omen (Mt. 28:19) dak amendaker March 25 nü Ungma Baptist Arogo Youth Ministry-i ayonga küm tepiyong saisapong balala agi Tsüngrem sentsüwangshidaktsüba sentong ka tenzukogo, ta UBA Youth Ministry sangdong ka ajanga metetdaktsü.
Iba sentong nung Ungma Village Council, Chairman Wb. Alemtoshi Imsong-i lanurtem dang asaya balala ajanga tanela anidentsü tayongzükba tulu agütsüba den saisapong sentong kanga meraketa tenzüktsüba osang ajangasa ashi.
Iba sentong nung tsürabur, Arogo nung tenzükertem aser yimsüsürtemi shilem tulu agia lanurtem ajungshiba asoshi tsüraburtem dang pelaba UBA Youth Ministry ketdangsürtemi lemsatep. Küm piyong iba sentong agi yonga aotsü sentong renema lir aser iba nung “Go sports League” ta sür lanurtemi football asayaba nung shilem agitsü, ta parnokisa metetdaktsü.