Ungma nung ‘environment week’ amung

Ungma, June 6 (TYO): Ungma Baptist Arogo Youth Ministry Environment Week “Purapitetba Tsüngrem” (Creative God) omen nung ajemdaker June 1 nungi 5 tashi munga liasü, ta UBA Youth Director, Imkümmereni osang ka ajanga metetdaktsü.
Iba Environment hapta ya sticker campaign UBA pastor Rev. Dr. Noklen Lkr ajanga sarasadema tenzüktsü aser item sticker-ji Ungma ajangba national highway aser yimtak senzüba garitem nung angati malokja liasü.
Yimtsüng merükteta lanurtemi maneni amung . Jara (wall)-tem kar shima tobur junga alima wazüka ayutsüba tajungshiba noksatem yangluba den süngdong aser yimdongtem nung naro balala tema liasü.
5th June, 2016 Environment Week tatembang anogo nung lanurtemi Tsüngremi nübur nem alima ketdangsütsü agütsüba tarokba nung angazüka tenangzükba tajung agia liasü. Ano maneni iba sentong nung jana indoka aliba mesüra tagidak mali ama bilemba ki osettem ajanga alima, memeneni teyari oset tajung yanglutsü sayuba sentonga ka agia liasü.
Iba Environment week amungba ya kuli küpdok mapa ka inyakba masü saka Tsüngremi nungloktsüba ketdangsüba ministry ta anagteta yimti nung aliba nübur nem tangatetba agütsütsü nükjidong yur ayongzük, ta kasa osang nungsa shisem.