Ungma nung NDPP 26 A/C kimen mesemtet

Ungma, Sept 27 (TYO): Nationalist Democratic Progressive Party (NDPP) Mokokchung Region, tir N. Bendang Jamiri Sept 27 nü Ungma yimdak 26 Aonglenden Assembly Constituency NDPP pur kimen mesemteta NDPP wako atsüketa yutsüogo.
Tanü iba wako atsüketba mapang 26 Aonglenden A/C nungi adoksang Nagaland Legislative Assembly (NLA) Deputy Speaker, Sharingain Longkumer densema liasü. Kimen tasen mesemteta Ungma Baptist Arogo, Assoc. Pastor, T. Wati Longkumer den temoatsü meshia sarasadem.
Iba sentong nung Deputy Speaker, Sharingaini mapang tatsüka agia jembidang, NDPP 26 Aonglenden Assembly Constituency pur kimen asütsü atema tsürabur Likokmereni mulungsoa agizükba asoshi pelaba lemsatep.
NDPP wako, party nüngja aser omen “o masü mapa agi” ta agütsüba nung ya tatishitsü aser tangatettsü aika sentaka lir, ochi asoshi telungjem nung raraba nung konang lir, anungji, party nükjidong nung ajemdaker ajaki shilem tajung agia inyaktsü asoshi pai tayongzükba agütsü. ‘Shisa obang ka sür telungjem nung inyakra, ibaji temelenshi tetenzüker asütsü’, ta paisa shisem.
26 Aonglenden ya tongtibang aser tashi tulu aliba assembly constituency ka lir, aji oda, iba constituency ya lungzük tajung ka kümdaktsütsü nükla lir, anungji, party puri iba constituency ya lenmang shitak nung tamshi shia amshitsü asoshi paisa inyakdaktsünüba olen ka lemsatep.
Tanü iba sentong nung NDPP central office Kohima nungi vice president aser Ex. MLA Imtiyanger, NDPP Mokokchung Region nungi vice president Yanger, Mokokchung Region Women Organization president Chibangla, 26 A/C president Nungsangmeren, NDPP 26 Aonglenden A/C kimen Likokmeren aser ano tangar karia o tatsütsü jembi liasü. Iba sentong nung NDPP pur telen balala nungi party tenzükertem arua aden.