Ungma putu mendeni AWUM nungiter

Mokokchung, August 18 (TYO): Mokokchung town aser temeküt yimtsüngtem nung mapang talangka light peria magütsütetba dak sentakba nung telok balala nungi nübur timtemba aser mepelaba ola adokogo, iba nungji Ungma Putu Mendenia pusema nungiter, ta Ungma Village Council Chairman aser Secretary Wb. Alemtoshi Imsong (Tatar) aser Imtisüngküm Lkr (Tatar) nati sangdong ka ajanga metetdaktsüogo.
Taoba mapang Mokokchung town nung nütsüng yari transformer amenlok, saka tanübo joko town renlokba den nütsüng jenti renloka odaki, aji saka, power department-i tensa den apet transformer tashi tuluba amenloktsü asameyang mesütetba asoshi sasar aser nübur teimla samaa odaki, ta parnokisa ashi.
Tanü putu nüngdak ajak light tashi agidang inyaker asünung, mapang shia transformer raksar light peria magütsütetba ajanga nüburtem rongsenkettsüng nung takoksa jenti ajurur, ta parnokisa power dept dang mepelaba olen ka shisem.
All Ward Union Mokokchung Town (AWUM) ajanga koba power department nem takhangba agütsüogo, iba nungji Ungma Putu Mendenia pusema nungiter aser ibaji takaratiba nung atalokjang, ta parnokisa metetdaktsü.
“Light junga maruba ajanga joko nübur kümli atur asünung, tensa tia tamajungba makümdang tekaratiba nung department-i tim mapa inyakdaktsüner”, ta kasa sangdong nungsa mepishia metetdaktsü.