Ungma ya Naga nunger ajak tebu lir: C.L John

Ungma, Dec 11 (TYO): Ungma ya Naga nunger ajak tebu lir aser yamaji Naga nunger anitsü asoshi nenok khuret tulu lir aser aji abentsüla ta tayongzükba ka agütsü.

Iba o ya Hogulbarnü Sports Society Soyim pur küm 25 ajungba jubilee sentong ka Ungma Babu Tzübo Amphitheatre nung Rural Development & REPA Minister C.L John-i tongti tesemdanger o jembidang ashi.

Paisa jubilee tetezü rateta ashidang, ibai tadok agütsütepba den amadokba, taoba mapang aser tang inyakertem nem akhüm tetushi agütsüba aser tarutsü atema temoatsü meshiba mapang ka lir, ta metetdaktsü.

Taoba mapang asenok ajak Naga nunger dang liasü, aji saka, tang amai asenok memetetepi liasü. Aji oda, Christianity aruba ajanga asenok lungjem aser kati ka den metetepa aküm, ta paisa kuli kar dena ashi.

Iba dak sentakba indang ashidang, Aor Tsüngrem tenzükertemi anüdok limai arua bendanga tenzükba ajanga tanü asenok Tsüngrem tenüng nung lungjemer aser ibai shingaia piladaktsütsü makok, ta paisa Ao kin nem tenüngsang agütsü.

“Yim ka nungi legislature asem tashi adoktetbaji Ungma nungi dang asütsü, ibaji dang saka Governor-a ka lir, ibai atamata masü. Anungji Tsüngrem tenüng asangtsüla” ta paisa ashi. “Ungma ya Naga nunger ajak tebu lir aser yamaji Naga nunger anitsü asoshi nenok khuret tulu lir”, ta paisa tayongzükba ka agütsü. “Naga nunger lennir ama nenoki inyaktsü nüburtemi imlar”, ta paisa shisem.

Dr. T. Ao ama Naga nunger saisapong tsütsü International tashi tongteta nüngtugu adokbaji Mokokchung district nungi lir. Aji oda, tarutsü nunga pa amaji saisaponger tajung jenti adoktsü nükla yur meranga asayatsü asoshi paisa ayongzüka liasü.

Kasa sentong nung Chief Host Deputy Speaker NLA, O Imtikümzük Lkria shilem agia tarurtem ajak pela agizükba den SSS pur jubilee nüngtem adokba nüngo kaket ka sayatsü. Imtikümzük ya taoba mapang SSS nung tir inyaka liasü.

SSS Jubilee bangzüng pezü renemba rongnung mezüngbubaji, senso temeja nungi asaya/saisapong tapu balala nung pei dak aketba sempet bushitettsü atema SSS-i tesütep mapang apir asaya sentongtem yanglutsü aser item asaya nung tajungtiba asayartemji temaba jenjang nung asayatsü asoshi lenmang sayua nungittsü bangzüng ka renemogo.

Tanabuba nung saisapong sempet ajanga pei taküm mesütettsü asoshi SSS-i lanuwa nungi pa/la dak aketba sempet bushiteta anepalua indaktsütsü renem.

Tasembuba nung Hon jubilee nükla nung Ungma nung Sports Academy ka tenzüktsü merangtsü. Iba denji külemi Sports Authority of India (SAI), All India Football Federation (AIFF) aser telok balala den tongtepratepa sports centre/institute, coaching camp amala tenzüka maparen balala inyaktsü lemteta ayu. Tatemsa SSS maparen balala achayanga aotsü atema ‘Trust Fund’ ka tenzüktsü lemtetogo.