Ungma yimdak Young Naga Club-i ayonga Moatsü amung

Ungma (Mokokchung), May 01 (TYO): May 01, 2017 nü 43buba Young Naga Club-i ayongzüka Moatsü benjong den repsema yar tsüngsang tetoktepba sentong tajung ka Ungma yimdak Babu Tzübo Amphitheatre nung kaogo.
Iba tetoktepba sentong nung Ungma yim kübok club ter (10)-i shilem agia liasü.
Sentong nung tongti tesemdanger o jembidang IPR Parliamentary Secretary, Wb. Imtikumzuk-i, tsüraburi benshiba sobaliba mamadoki wazüka ayutsü nükla nung Young Naga Club-i iba ama sentong tajung ayongzükba asoshi pelar, aser iba sentong ajanga Naga nunger dang tatishitsü tajung ka sayur, ta metetdaktsü.
“Akhi asen tsüraburtemi benshiba sobaliba tajungtemji asenoki temulung agüja angazükba den asen yim ya sobaliba kentenmenü tsütsü nüngtugu kümdaktsütsüla,” ta ashi.
Sobaliba angazükba den kaketshisatsü bushiba nunga kasa temulung agütsütsü asoshi paisa ayongzüka liasü.