Ungma yimtak ATM booth ka lapokogo

Mokokchung, April 25 (TYO): Hombarnü Ungma yimtak Bank of Baroda pur ATM booth tasen ka lapokogo aser ibaji Ungma Village Council, Chairman, Wb. Alemtoshi Imsong ajanga meraketa lapoktsüogo. Ungma Baptist Arogo, pastor, Rev. Noklen Lkr den iba ATM booth meshiteta sarasadem.

Tanü putu taküm kibong lia aotsü asoshi ‘banking service’ ya kanga tongtibang lir, iba ajanga asenok nem tajangzük tapu balala agütsür, ta Alemtoshii ashi.

Yimtak yimtsüng nung banking service ya aikati meteta arudaki, saka ano aikati metetaka mapa küma meinyaker, anungji, nübur ajaki iba maoangkaji agitsüla, ta paisa inyakdaktsünüba olen ka ashi. Ungma yimtak Bank of Baroda Branch office lapokba ajanga yimertem dang masü saka kishikina yim aika tajangzük ngudaki, ta paisa metetdaktsü.

Mokokchung district kübok yimtak bank tenzükbaji Ungma nung mezüngbuba lir aser tanabubaji Changki yim asütsü. Ungma nung Bank of Baroda (Branch office) ya 2012 küm December 31 nü lapok aser tang tashibo nübur teyari ajanga kanga junga odaki, ta iba osangbeneri Ungma Branch ketdangser ka den jembidang lai ashi.

Ungma nung Bank of Baroda branch office-ji Ungma Baptist Arogo tenla ki jakdang ‘Süzümeren Reju’ nung amenoka lir aser ATM booth-jia office anasa dang angutsü. Iba ATM booth ya 24×7 lapoka ayutsü.