Patna, July 02 (Agencies): Centre sorkari Law Commission dang linük tesem ajunga nung Uniform Civil Code ka benoktsü atema shisadanga reprangshiang ta tuyuba aija Honibarnü Bihar Deputy Chief Minister, Tejashwi Yadav-i, iba ya BJP-i nüburtem ashioktsütsü atema tasa ka benokba dang lir, ta ashi.
Patna nung osangbenertem den jembidang Yadav-i, Uttar Pradesh Assembly Elections agitsü mapang ana nung lir, aser taoba mapangtem ama BJP-i yazü tenangzükbatem ajanga nüburtem ashioktsütsü meranger, ta ashi.
Tang linük nung Hindu aser Muslim nunger atema nija ozüngtem balala lir. Nija ozüngtem nungji kiojen, kiyimba, senmang amangba aser menden atsüngba densema lir.
Yaküm Delhi nung BJP lenir kati, Muslim tsürtem dang mejungi benshiba anentsü atema uniform civil code ozüng latettsü asoshi Parliament dang tuyutsü atema mepishi, ajisüaka Supreme Court-i ibaji magizük.
Supreme Court Chief Justice, TS Thakur-i aniba bench-i, iba dak sentakba nung Supreme Court-i Parliament dang Bill ka benoktsü atema tetuyuba magütsütettsü, ta ashi.
“Election atongtsü mapang shia parnoki item amaji nangzüker,” ta Yadav-i ashi.
“Parnoki Uniform Civil Code benoknüra, parnoki Jammu and Kashmir nung tama benoktsüla. Yangji parnok sorkar tashi nung lir,” ta pai ashi.
Bihar Deputy Chief Minister-isa, Centre nung sorkar tashi nung alirtemi kecha meinyaktettsü, ta ashi.
“Par onük nung ajemdaker nüburtem matsüngdang olulu prokba tasa parnoki benoktsü meranger. Ibaji parnok tangatetba, aser ibaji anemsü nung ajemdaker inyaker,” ta minister-isa ashi.
Yashi Union Law Minister, Sadananda Gowda-i, Parliament nung Uniform Civil Code onük atema pa dang aiben asüdangogo, aser iba nungji ajemdaker pai Law Commission dang iba code nung report ka agüjang ta tuyuogo, ta metetdaktsü.
Iba code ya Parliament nung agizüka mapa küma benokra linük nung tamangba yimsü balala nungi senso ajak atema civil ozüngtem kasa/ka dang asütsü.
Uniform Civil Code ya mangatettep aliba onük ka lir aser iba ya BJP election manifesto nung densema lir.
You must be logged in to post a comment Login