Union Baptist Church Kohima-i HARD TALK sentong ka ayongzük

Kohima, Yimpoksüi/Nov. 20 (TYO): Union Baptist Church, Kohima ajanga November 17, 2019 anogo HARD TALK sentong ka ayongzüka liasü, kong NVCO tir aser advocate aser national award angur Kezhokhoto Savi tongti o jembir liasü. Savi nem “Consumer Awareness Campaign related to Food Safety & Security” onük nungi jembidaktsü aser pai ashiba agi, Nagaland Voluntary Consumers’ Organization (NVCO) ajanga Nagaland state ajungalen “Consumer Awareness Campaign” tagidak lir, anungji NVCO nem iba onük jembitsü agütsüba ya kanga tetemsü.
Savi-i ashiba agi tanü tensa nung Consumer Protection ya ajaki süoki ia bikemtsüla aser linük nung senso ajak asoshi tongtibang lir. Consumer Protection Act 1986 indang provision ya temelen agütsütsü amai lir aser Central sorkari matok tashi ‘goods and services’ ajunga nung amshir aser private süang, public mesüra co-operative sector ajunga ayimjemer. Consumer movement takok ngua nübur ajungai shilem agitettsü asoshi senso ajak kanga kümdanga yakyaka alitsü tongtibang lir. Tekümdang consumer kati chiyongtsü mesüra osettsüset meshidaki yangluba, oset tamajung, service tashi maitba, tanga oset den meyoktepba, tim lenmang nung mesüi yokyayokchiba amala tebilemtsü ajema kümdaktsüba nung yaritettsü,” ta pai ashi.
“Anogoshi asen nüngdak peritsü asoshi asenoki goods and services karbosa amshir. Yamaji asenok alima nung liyonga aor. Anungji asenok asoba mapang nungi asüba tashi consumer kaka lir. Asen taküm nung asenoki aginüba aika lir. Asenoki mopung, tzü, anü tesangwa aser tabu aika alimar yimyatem nungi aginer. Asenok item sempet ya angati agir. Saka asen taküm yaritsü asoshi ano tali nüngdaker,”
Right to safety indang jembiba mapang, tim masüba yimya balala nungi kümzüktsü mechi goods and services indang quantity, purity, standard aser jenjang metettsü consumer dak temeden lir, ta pai ashi.
Mamatzü tzü tali den meyoktepba, mesüra mamatzü timba kümdaktsütsü aser mapang talangba amshitettsü mechi glucose, starch, detergent aser urea amshia yangluba maparen aika asenoki meteta lir. Mapang ka maggi sample tem tendangba mapang Monosodium Glutamate(MSG), koba dang Ajinomoto ta ajar, iba mozü aser lead tali aliba putet.
Nagaland nunga Dimapur aser temeket tesemtem mita aoba mapang züngi, teti, jarem aser pengana amala chiyongtsü seret 5000 indoktsü, kechiaser item chiyongtsü nung cancer adokdaktsüba calcium carbide (tamen kümdaktsüma mozü) keta aliba putet. Iba sülen ango nung formalin amshiba putet. Formalin ya tamajung mükemdaktsüba aser tezü-tera takhangba kümdaktsüba mozü ka lir, aser iba mozü ya biological specimens nung amshir aser nisung mesüra shiruru tasemang talanglang shisaa modaktsütsü asoshi amshir.
Savi-isa ashiba agi, tanü asüngka yimtong nung chiyongtsü ayokba timba akümer, kong pokora, samosa, entzü aser ango amala totzü aika amshia rur ayoker. Chiyongtsü aruba nung amshiba totzü tatsük maneni amshiba ajanga totzü nung aliba properties raksatsü aser iba amala totzü nung aruba chiyongtsü achiba ajanga food-poisoning aser, temulungjang aser tezütera tashidak adoker, hypertension aser cancer adokdaktsür.
Ano maneni asenoki osangkaket amshia chiyongtsütem aleper. Osangkaket menüngba nung amshiba ink/Black carbon nung sentsü, pigments, additives aser preservatives amala keta lir, koba temang asoshi majung. Aser kodang chiyongtsü talem, totzü aketba chiyongtsü mesüra chiyongtsü tayi ya osangkaket nung yudir, ink ya chiyongtsü nung yimsaa aor aser asenoki achi, koba temang asoshi kanga majung, ta NVCO tiri ashi.
Paisa ashiba agi, kiset shiruru aser ak-an nung antibiotics tali amshiba, alu nung pesticides amshiba ya tebilemtsü tulu lir. Item ajak yagi asen temang nung timtem agütsür, ta Savi-i iba sentong nung adener nem angatetdaktsü aser Food Safety & Standard Act 2006 aser National Food Security Act 2013 nung shia aliba temzüng ozüngtem lemsatepa liasü.