Union Budget nung healthcare scheme ji yazü: P Chidambaram

New Delhi, Tsüklai 02 (Agencies): Yashi Parliament nung Finance Minister, Arun Jaitley-i Union Budget benokba dak sendakba nung Congress-i, sensaker kibongtem healthcare atema sen lakh 5 agutsütsü nangzükbaji yazü, iba den külemi sensakertem income taliba akumtsü atema budget nung kecha shia mali, ta aitsü.
New Delhi nung osangbenertem den jembidang Congress lenir aser taoba mapang Union Finance Minister, P. Chidambaram-i, Budget nung average tax payer atema saru khuret mepungba aser Exports ajungkettsü atema mera agia mali, ta ashi.
Parliament nung Budget onük jembidang Finance Minister, Arun Jaitley-i, sensaker aser tepetzük tia nung aliba kibong crore 10 ayimjemtsü atema National health protection scheme tenzüker, ta sangdongba dak sendakba nung Chidambaram-i, ibaji ajanga sen aika indoktsü, ajisüaka iba atemaji sorkari sen lemzükja mali, ta aitsü.
“Sensaker aser tepetzük tia nung alir kibong shia nem healthcare atema sen lakh 5 agutsütsü nangzükbaji yazü nung nangzükba. Alizüngji kibong crore 10 lir. Item kibong shiai sen lakh 5 nungjagi shilem 10- sen 50,000 danga angutsü atema küm shia sen lakh crore 5 nüngdaktsü,” ta Congress Party lenirisa ashi.
“Iba atema senji kong lemzükja ali? Premium agutsütsü atemaka sen lemzükja mali,” ta shia Chidambaram-i, Jaitley aser NDA sorkari iba ya alima nung healthcare scheme tulutiba ta asüküma jembir, ta aitsü.
Congress lenirisa, Budget onük nung exports ajungkettsü atema Finance minister-i kecha mejembi, ta aitsü.
“Kechiyong exports ajungkettsütsü atema sorkar asalentong mali, Finance Minister-i customs duties tali tuogo. Ato kilonseri jembiba onük aser Davos osang tu anogo ishika tsüngda amadokogo,” ta paisa aitsü.
Chidambaram-i, minimum support price (MSP) 1.5 ben agi timba akumtsü nangzük, saka iba osangji tejangja shia mali, ta ashi.
Aluyimba tsütsü maneni jenjang mejungi alitsü aser tamajungba akumtsü, nübur timbaka aluyimba nung metaloker alir, ta pai ashi.
Chidambaram-isa, kanga tongtibang schemes kar nung senotsü ajema lemzüktsütsü, aser item schemes ji- Mahatma Gandhi National Rural Employment Guarantee Act, Pradhan Mantri Awas Yojana, National Drinking Water Mission, Swachh Bharat mission, National Health Mission, Mid-Day meal scheme, interest subsidy for short-term farm credit, north eastern investment promotion, price stabilisation fund aser Gram Jyoti Yojana lir, ta metetdaktsü.