Union Budget nung tasen kecha mali: Congress

New Delhi, July 05 (Agencies): Hokolbarnü Congress Party-i, Union Budget 2019-20 nung tasen kecha mali, aser iba budget ya sorkari nüburtem dang nangzükba ama masü, ta aitsü.
Parliament kima osangbenertem den jembidang Lok Sabha nung Congress lenir, Adhir Ranjan Chowdhury-i, “Iba ya pongdang tasen ka nung yi tejen inokba mesük. Nüburtem timtem ano taliba akümtsü. Iba budget nung tasen kecha mali,” ta metetdaktsü.
Tanü Parliament nung Union Finance Minister, Nirmala Sitharaman-i Union Budget benokba sülen Congress lenir aser Rajya Sabha züngsem, Motilal Vora-ia, “Iba Budget nung sensakertem atema kecha mali,” ta ashi.
Sorkar aija Congress otongdar, Randeep Singh Surjewala-i, “Iba budget nung rongsenkettsüng asentenshitsü atema kecha mali. Yimtsüngtem aintsü atema kecha mali, mapa adokdaktsütsü atema kecha mali. Jilatem asentenshitsü atema kecha mali,” ta ashi.
Ano tanga tweet ka ajanga Surjewala-i, “Yimtsüngtem, aluyimertem aser sensakertem timtem tulu nung lir. O ishika ajanga aluyimertem timtem bentettsü asü? Minimum support price (MSP) atema kecha nangzüka mali, tsüngsarusa atema kecha nangzüka mali, aluyimertem rongsenkettsüng ajungkettsütsü atema kecha mali, yimtsüngtem rongsenkettsüng ajungkettsütsü atema kecha mali. Diesel jenjang sen 2 tuogo,” ta aitsü.
Paisa, “Alima tesem ajungalen petrol aser diesel jenjang ajemba mapang nung nübutem nem tajangzük agütsütsü melen sorkari excise aser cess tax sen ka inoksemtsü lemtetogo. Iba ya aitsütsü tetemsü aser sensakertem tebok nung ajemoktsüba den kasa,” ta ashi.