Union Cabinet-i ICDS kübok sub-scheme balala agizükogo

New Delhi, November 16 (Agencies): Integrated Child Development Services (ICDS) kübok Anganwadi Services, Scheme for Adolescent Girls, Child Protection Services aser National Creche Scheme ama sub-schemes 2018 küm November tashi mapa küma inyaktsü atema Union Cabinet-i Brihostibarnü agizükogo, aser cabinet-i item schemes atema sen crore 41,000 dak tema lemzüktsüogo.
Ato kilonser, Narendra Modi mendenbuba ser amenba senden nung Cabinet Committee on Economic Affairs-i Integrated Child Development Services (ICDS) kübok sub-schemes agizük, ta sorkar osang ka ajanga metetdaktsü.
Item schemes ji April 1, 2017 nungi November 30, 2018 tashi mapa küma inyaktsü, ta kasa osang nung shia lir.
Union Cabinet-isa arishi küm 11-14 tsüngdapur school mazünger tetsürtem asoshi Scheme for Adolescent Girls agizükogo.
“National Creche Scheme ya central sector nungi centrally-sponsored scheme akumtsü aser legislature kübok state den union territory ajak asoshi sen telemsaji 60:40 asütsü atema cabinet-i agizük. Iba ratio ya northeast state tem aser Himalayan state tem asoshibo 90:10 asütsü aser Union territories atema shilem 100 asütsü. Item schemes ya tang achaayanga inyakba agency tem ajanga masü saka states aser union territories ajanga inyaktsü,” ta ketdangsertem sangdong nungsa shia lir.
Iba scheme ya ajanga tanurtem, mashisa tetsürtem aser aiür chanurtem crore 11-i tajangzük angutsü, aser iba atemaji sen crore 41,353.70 lemzüktsüogo.
Ano Anganwadi Services (ICDS) aser Child Protection Services bo linük tesem ajungalen mapa küma maneni inyakdar.
Scheme for Adolescent Girls yabo shilem aika küma lemsar benoka inyaktsü.
National Creche Scheme maneni crèches 23,555 nung benoka inyaktsü. Ano National Nutrition Mission atemabo senden balaka ayongzüka amentsü.