Union Cabinet-i triple talaq indang ozüng agizük

New Delhi, Rongjui (September) 19 (Agencies): Bodbarnü Prime Minister Narendra Modi menden ser Union Cabinet senden amendang ‘triple talaq’ inyakyim ya ozüng alema inyakba mapa ka ta asüba temzüng agizük.
Iba mapa inyakertem küm asem tashi tepuokdak ayutsü.
Sorkari tawa Rajya Sabha indang monsoon session nung triple talaq bill mesüra The Muslim Women (Protection of Rights on Marriage) Bill, 2017 benoka magizüktetba sülen tanü Cabinet-i iba telemtetba agiogo.
Iba temzüng kübok, tetsürlai mesüra lar kinunger kati ken o benok nung dang ozüng alema inyakba mapa ta züngoktsü.
Tanabuba nung, tetsürlai magistrate dangi aoba sülen apuani tsüngda angatettepra ken o ji agientsü akok.
Tasembuba nung, magistrate-i tetsürlai ashiba angaba sülen tai tongloktsüdangji bail nung chioktsü temelaba agütsütsü. Magistrate-isa tetsürla nem tanur reprangtsü aser teyari agütsütsü atema telemtetba agütsütsü.