Union Minister ana- Maneka aser Javadekar tsüngda mangatettep adoker

New Delhi, June 09 (Agencies): Environment Minister, Prakash Javadekar-i arem shirurutem tepsettsü atema temelaba agütsüba anema Brihostibarnü Union Minister, Maneka Gandhi-i Environment Ministry aija, ‘shiruru tepsettsü atema jangraba ya ni mangateter’, ta ashi ajisüaka Prakash Javadekar-i, alu nung aonsotsütem kümzüktsü atema state temi mepishiba nung ajemdaker iba temelabaji agütsü, ta rajemtsüogo.

Women & Child Development Union Minister, Maneka ya shiruru temeten atema inyaker ka lir.

Tawa Bihar nung ‘nilgai’ ta ajaba jang tepsetba dak sentakba nung Maneka-i, “Iba ya timtiba tepsetba lir,” ta ashi.

Maneka-i ashiba agi, “Union Environment Ministry-i state sorkar ajak dang, Centre-i temelaba agütsütsü atema tepsettsü aliba shirurutem tenüng agüjang ta metetdaktsüogo.”

Laisa, “Iba ya tang mezüng ataloker. Shiruru tepsettsü jangraba ya ni mangateter,” ta ashi.

Ajisüaka Javadekar-ibo, iba ya shiruru nütsüng dak sendakba nung “scientific management” ka lir, ta ashi.

Maneka-isa, “State balala nungi wildlife department temi parnoki shiruru tepsettsü memelunger ta shiaka Centre-i Bihar nung ‘nilgai’ tepsettsü atema temelaba agütsü, West Bengal nung shiti, Himachal Pradesh nung shiongo, Goa nung peacock aser Chandrapur nung pongzü tepsettsü atema temelaba agütsüogo,” ta aitsü.

Bihar nung ‘nilgai’ tepsetba dak sentakba nung lai, yimtsüng lenirtem mesüra aluyimertemi shiruru tepsettsü atema temelaba memeshi ser nung tepsetogo, ta ashi.

Iba oji langzüa Javadekar-i, “Ibaji tang aliba ozüng nung ajemdaker inyak, aser iba ya Centre sorkar mapatong ka masü,” ta ashi.

Environment Minister-isa, “Tang aliba ozüng nung- kodang aluyimertemi timtem aika ajurudir aser parnok indang aonsotsü khenyongi raksatsüdir, aser state sorkari temepishiba ka benokdir, idangji ang onoki melar (shiruru tepsettsü) aser scientific management atema mapang aser tesem kar apir state sorkari mepishibaji agizüker,” ta ashi.

“Iba ya Centre sorkar mapatong ka masü. Ozüng nung aji oda lir,” ta paisa ashi.

Maneka-i, “Maharashtra nung tzünglu maruba tesem Chandrapur nung pongzü 53 tepsetogo, aser Environment Ministry-i ano pongzü 50 tepsettsü temelaba agütsüogo, state wildlife department-ia ibaji memelunger,” ta ashi.

Ano külen iba maongka agia opposition party temi, Centre sorkar ministry tem tsüngda tangatettep mali, ta aitsüogo.

JD(U) otongdar, Ajay Alok-i, “Ministry tem tsüngda telongjem mali. Iba ya tang mezüng ataloker masü. Ministry ajak mangatettep adoker aser ibaji ajanga mapa anüngdaka ayur. Tangatetep nung meinyaker,” ta aitsü.

NCP otongdar, Rahul Narvekar-ia, “Sorkar ministry balala tsüngda obang mapur. Iba ya-a junga yimsü masüba tatishitsü ka lir,” ta ashi.

Ano külen temetetdaktsüba ka ajanga, Environment Ministry-i, Himachal Pradesh nung ‘Rhesus Macaque’ ta ajaba shiongo ji küm ka atema “vermin” ta sangdongogo. Iba sangdong ajanga shiongo jenti tepsettsü atema state sorkar nem temelaba agütsür.

‘Vermin’ tetezü, aonsotsü, kiset shiruutem atema lendong aketba shiruru mesüra tashitak abenba shiruru lir.

Himachal Pradesh nung Chamba, Kangra, Una, Bilaspur, Shimla, Sirmour, Kullu, Hamirpur, Sonlan aser Mandi district tem nung shiongo tepsettsü.