Union Minister Ananth Kumar alima nungi pilaogo

Bengaluru (Karnataka), Yimpoksüi/November 12 (Agencies): Hombar nepdang yakta nija hospital ka nung Union Minister for Parliamentary Affairs, Ananth Kumar cancer tashidak agi süogo; pa arishi küm 59 liasü.
Karnataka sorkari state tesem ajaklen asür nem akhüm aguja anogo asemnü mangyimtsü atema sangdongba den külemi asür nem akhüm agüja tanü public holiday sangdonga liasü.
Osangbener den jembidang Party state unit otongdar, S. Shantaram-i, “Kumar October 21, 2018 nü United States nungi meyipa aruba sülen Shankara Cancer Hospital nung hopta asem shi monger tanep 3:00 ako meta süogo,” ta metetdaktsü.
Kumar ya 2014 küm May ita nungi Centre nung BJP-i aniba NDA sorkar nung Chemicals & Fertilisers Minister-a inyaka liasü.
1996 küm nungi tenzüka Bengaluru South Lok Sabha constituency nungi MP trokben inyaksang, Ananth Kumar cancer tashidak agi shiranga taküm August ita nungi United Kingdom aser US na nung treatment agia liasü.
Taküm July-August ita nung tzüngluruwa Parliament senden tembangba sülen pa London-i oa treatment agi, iba sülen pa New York hospital nung monga liasü, ta osang angazüker.
“Pa dak cancer tashidakji temang nung prokshi, aser ibaji ajanga tenük telen aikati mapa meinyaki pa süogo,” ta Shantaram-i ashi.
Kumar-i pa kinüngtsü Tejaswani den jala ana- Aishwaraya aser Vijayeta na, teno Nand Kumar aser par aianu Suhasini nunger toktsür pilaogo.
Kumar mangji par kidangi bener aoba sülen Basavangudi nung aliba office-i bener ao.
“Nüburtemi asür nem akhüm agutsütsü atema tasümangji National College grounds, Basavangudi nung ayutsü iba sülen Mongolbarnü asüpila sentong agitsü,” ta party ketdangser kati metetdaktsü.
“State tesem ajaklen sorkar kiojentem nung linük wako tom nung ayutsü aser Bodhbarnü tashi official sentong ajak thinener,” ta Karnataka nung Congress-JD-S teloktep sorkari metetdaktsü.
Kumar nem akhüm agüja tanü state aser Central sorkar office tema shibanga liasü.
Ano Karnataka Education Department-ia yimti nung school aser college ajak shibangdakja asür nem akhüm agutsüogo.
Kumar asüba osang prokba sülen yimti nung nisung meyirjang aika par kidang adenshia liasü.
Ano Bharatiya Janata Party lenirtem, state BJP unit Tir aser taoba mapang Karnataka Chief Minister, B.S. Yeddyurappa aser MLA tem- R. Ashok aser Suresh Kumar nunger densema lenir aika par kidang adenshia mangyimogo.
“Mongolbarnü Kumar den asüpila sentong nung Ato kilonser, Narendra Modi, Union Minister tem aser Central party lenirtem adentsü imlar,” ta Shantaram-isa metetdaktsü.
Linük Tir, Ram Nath Kovind, Ato kilonser Narendra Modi, Union Home Minister, Rajnath Singh, Union Finance Minister, Arun Jaitely, Defence Minister Nirmala Sitharaman aser Union Minister Nitin Gadkari nungeri Kumar’er kibong züngsemtem den mangyim jashi osang lemsatepogo.
Ano Karnataka Chief Minister H.D. Kumaraswamy, Deputy Chief Minister G. Parameshwara, Janata Dal-Secular (JD-S) aser Congress teloktep sorkar nung cabinet minister temia mangyim osang lemsatepogo.