Union Minister-i ayongba senden nung PHED Nagaland aden

Dimapur, June 11 (TYO): Union Minister for Jal Shakti GOI-i Water Conservation atema state minister tem den senden ka amentsü ayongba nung PHED Nagaland Minister N. Jacob Zhimomi den külemi Commissioner & Secretary Water Resources, Nagaland aden.
Sendenji June 11, 2019 nü Vidyan Bhawan, New Delhi nung amen.
Union Minister Gajendra Singh Shekhawat-i iba senden amentsü ayongzükba atema state balala nungi Minister temi pa nem tenüngsang agütsü.
Centre sorkari Jal Shakti Mantralaya (Drinking Water & Sanitation) ta ser ministry tasen ka kümtetba atema parnokisa pelaba metetdaktsü.
Senden nung N. Jacob Zhimomi-i o jembidang Chief Minister aser Nagaland sorkar tenüng nung mezüng Union Minister nem tenüngsang agütsü.
Nagaland nung water supply indang osang lemsatepdang yimtsüng tia nung aliba tesem 2000 shi lir aser iba nungi 48.76% dang supply connectivity lir aser tanüngba 51.3% ano metongjemi lir, ta Jacob-i ashi.
Jacob-i Union Minister Jal Shakti dang 2024 tashi nung Nagaland ajungalen tzü supply atongtsü atema yariteptsü mepishi. Iba temepishibaji Union Minister-i molunga agizük.
Gajendra Singh Shekhawat-isa state tem dang tzü lemsatepa amshitsü tebilemba ka lemsatep aser Department of Drinking Water o Department of Water resources lokteper Ministry of Jal Shakti Mantralaya akümba osang metetdaktsü.