Union Minister-i Dhansiri-Zubza train lenmang tekaratiba nung yanglutsü nangzük

August 1 , 2016 nü Dimapur Railway station nung Union minister Railways, Suresh Prabhu-i remote button ajanga nüngshilung sayatsüdang agiba noksa angur. Noksa nungsa Minister of State, Railways Rajan Gohain, Nagaland Chief Minister, TR Zeliang aser Angh, PB Acharya nunger angur.

Dimapur, August 1 (TYO) : Union minister of Railways, Suresh Prabhakar Prabhu-i Dhansiri nungi Zubza (Kohima) tashi yanglutsü aliba Broad Gauge (BG) line 2020 nung tembangtsü ta mapang lateta aliba nungi küm ka jakdang yangluzüktsü, ta nangzük.
2007-08 küm Railway Board-i iba train lenmang (kilometer 90.5) yanglutsü temepishiba agizüka liasü.
2007 küm iba ya national project ta züngok aser sen crore 2315.30 lemzüktsü. Iba mapatong ya shilem asem lemsar agitsü aser itemji- Dhansiri nungi Sukhovi (16km); Sukhovi nungi Khaibong (30km) aser Khaibong nungi Zubza (45km) ta asütsü.
Hombarnep Dimapur Railway station nung Union Minister, Suresh Prabhakar Prabhu-i lung azünga yutsüdang ashiba agi, “Ministry-i 2019 tashi nung iba mapa tembanga inyaktsü lemtetogo, kechiyong India-i mapatong renemtsü matateter,” ta ashi.
“Mapatong inyaktsü atema senotsü tetsükdaktsü kecha mali aser taoba mapang nungi ministry-i senotsü talila lemzüktsüogo,” ta paisa ashi.
“Nübortem taginüba tongtsütsü atema Railways-i northeast nung sen crore 7000 lemzüktsütsü. Taruba küm 5 tsüngda onoki North east tesem nung terenlok mapa inyakba nung sen crore 35000 nungi 40000 tsüngda endoktsü alizüng yua lir,” ta Suresh Prabhu-isa shisem.
Paisa ashiba agi, “North east India nung kilometer 43 dak alaka tanüngba tesem ajak Broad Gauge den sendaktepogo aser maneni ministry-i mapatong inyaktsü lateta aliba jakdang renemtsü atema mapa inyaker. Technology tasentem amshia ministry-i mapatongtem inyaktsü aser BG network ajanga NE state yimtiba ajak linük yimtiba den sendakteptsü atema alizüng lir.”
Train lenmang tasenba nung station tem ajak sobaliba dak sendakba nung yanglutsü aser design temji lisopurtemi agütsütsü. Sobaliba tajung aser yimyatem tanü-asüng benshiba yimyatem ajanga mesamadaktsütsüla. Ministry-i state sorkar den yaritepa Dimapur nung skill development tenzüktsü aser iba atema ITRC pur Nagaland-i arutsü, ta paisa metetdaktsü.
Tanü sentong nung Minister of State, Railways, Rajan Gohain-ia o jembidang, mapang talangka north east region nung terenlok makai aruogo, saka BJP-i aniba sorkari north east nung temulung agüja mapatong aika tenzüktsüogo, ta ashi.
Küm ana tsüngda, Assam dak alia tanüngba North east state tem rail network ajanga sendaktepogo, ta paisa ashi.
Nagaland chief minister, TR Zeliang-ia train lenmang tasen yangluba nung ali kiburtem dang state sorkar, Northern Railway Frontier aser Railway Board nunger den amalitepa inyaktsü atema mepishia metetdaktsü.
TR Zeliang-isa union minister Suresh Prabhu dang, Dimapur nungi Tizit tashi kilometer 257 rail line yanglutsü agizüktsü atema Cabinet Committee on Economic Affairs den jembitsü mepishia ashi.
Iba train lenmang ya sen crore 4274 endoka yanglutsü asadangteta lir aser Railway-i feasibility report agütsüogo saka ano magizük lir, ta chief minister-i metetdaktsü.
TR Zeliang-isa ministry dang 1997-98 küm sen crore 2136 endoka Dhansiri-Karong railway project yanglutsü lemzüktsüba tanaben asentenshia inyaktsü atema mepishi. Centre sorkari Act East Policy nung shilem ka ama South East Asia den tesentaktep yanglutsü süra iba project ya tanaben lepa bener arua tenzüktsüla, ta paisa shisem.
Sentong nung Nagaland Angh PB Acharya, Member, Engineering Railway Board, AK Mittal, aser General Manager, NF Railway, Chahatey Ram nungertemia o jembi.