Union minister Irani-i Nagaland nung sericulture project balala lapoktsü

Union Minister of Textiles, Govt. of India Wt. Smriti Zubin Irani-i State Minister of Home Affairs, Kiren Rijiju densema Sabangya (Chungtia) nung ‘sericulture development project’ ka lapoktsüba mapang tangokba noksa nung angur. Mokokchung, February 22, 2019.

Mokokchung, Feb 22 (TYO): Feb 22 nü Union Minister of Textiles, Govt. of India Smriti Zubin Irani-i State Minister of Home Affairs, Kiren Rijiju densema Mokokchung district kübok Sabangya (Chungtia) aser Kobulong nung sericulture development project balala ana renema lapoktsüogo aser ano tenatisa Kiphire aser Wokha district nunga ibala mesüktepba mapatong ana inyaka aotsü atema tenzüktsüogo.
Tanü Sabangya (Chungtia) nung lapokba mapaji “Post Cocoon Technology Project” aser Kobulong nung lapokbaji “Muga P3 basic Seed Station” lir, aser iba project anaprongji North East Region Textile Promotion (NERTPS), Ministry of Textiles Govt. of India kübok inyak. Sabangya o Kobulong ya Mokokchung town nungi kilometer ishika dang pilar lir.
Sabangya nung amenokba “Post Cocoon Technology Project” nung ya mapa balala inyaktsü atema sentsü melenba (dyeing) unit ka den twisting unit ka aser Common Facility Centers (CFC) ana densema lir. CFC shia nungji sütakmentak nung amshiba kol (weaving looms) tenem-nem amenoka lir.
Smriti Zubin Irani-i iba sentong nung jembidang, Indian rangben nung North East region nung aliba state-temi talisa – mulberry, oak tasar silk, muga aser eri nung noklang shilem jungnüa züsenteta shilem agidar, anungji, ibai jangratemtsüka lir, ta metetdaktsü.
Nagaland state-i silk luyimba (sector) tsütsü aser talisa eri metsüba nung shilem tajung agiba ngua Ministry of Textiles Govt. of India-i “eri junga metsüba state” ka ta shisanga tawa to award agütsüogo, ta laisa pelaba lemsatep.
North East state-tem nung iba mapa takok ngua inyaktsü atema Ministry of Textiles-i tongtibangsa tetsür rongsenkettsüng jenjang ajungketba maparen balala nung akokba tashi nungita aser teyari balala agütsütsü merangtsü, ta laisa teyari lenmang kar lemsatepa liasü.
Tetushi tesemdanger State Minister of Home Affairs, Kiren Rijiju-ia mapang tatsüka agidang, Smriti Zubin Irani-i talisa North East region balaka meima sericulture luyim tsütsü temelenshi tulu bener arutsüogo, ta tenüng sanga ashi. Naga nunger nem Tsüngremi fashion aser designing tsütsü sempet balaka moaja lir aser Naga nungeri sericulture luyimba tsütsü temulung agütsüra tanga state-tem dang nungi alakteta noktaktettsü ngujem lir, ta paisa inyakdaktsünüba olen ka shisem.
“Naga nunger tebilemtsütemji nia angateta lir aser kü mulung nunga lir”, ta shia North East aser Nagaland renloktsü tebilemba aliba kar lemsatep.