Union Minister MJ Akbar-i Shillong semdang

Shillong, Rongjui (September) 19 (Agencies): Union Minister of State for External Affairs MJ Akbar-i Shillong nung arua lir aser yashi pai Meghalaya Chief Minister Conrad K Sangma den ajurutep.
Union Minister Akabar aser Chief Minister Conrad na senden amendang ASEAN (Association of Southeast Asian Nations) den tesentaktep aser sobaliba tsütsü akangshitsü atema tebilembatem lemsatep.
“Akhümtsübua aliba MoS MJ Akbar-i Shillong semdangba pela agizüker. Pa den onük aika lemsatepogo” ta Conrad-i pa indang Twitter nung metetdaktsü.
M J Akbar-ia ashiba agi, Meghalaya nungi kentenbaren ajanga linük nung dang masü saka alima ajungalen naroküm angur.
Osangbener den sensaksemdang paisa ashiba agi, Meghalaya nung kentenbaren ya sobaliba ka lir aser linük nung dang masü alima kübok tesem aika nung nisungtemi kanga junga meteta lir.
Meghalaya ya Indian Council for Cultural Relations international music aser cultural diplomacy nung shilem ka lir, ta paisa shisem.
Shillong Chamber Choir-i aiben Meghalaya atema aiben konang bener arutsüogo, ta Akbar-isa metetdaktsü.
Shillong Chamber Choir ya 2001 nung Neil Nongkynrih-i tenzükba lir. 2010 küm TV show ‘India’s Got Talent’ nung takok anguba sülen parnok linük nung ajaki meteta aküm.
Kasa küm SCC-i World Choir Games for Musical Sacra, Gospel and Popular Music nunga gold sempet asem tashi nguteta liasü.
Taoba United States Tir Barak Obama aser kinungtsü Michelle Obama nati India semdangdang SCC-i Rashtrapati Bhavan nung shilem agi.
Tawa tu Aroha Junior Choir ta ser ano choir telok kati Wales nung International A Capella Group telemsa nung takok angu.
Iba choir nung Shillong kübok aliba school, kin aser arogotem nungi kaketshirtem dena lir.