Union Minister Prakash Javadekar-i Nagaland nung Molulem ozü reprangi arutsü

Forest, Environment & Climate Change Minister, Dr Niekiesalie Nicky Kire, MLA Vikho Yhoshü, Principal Secretary (Forest) NN Zhasha, PCCF Nagaland M Lokesawra Rao aser ketdangsertem Teqweazou, Kigwema nung Watch Tower lapokba sülen agiba noksa angur.

Kohima, November 12 (TYO): Union Minister for Forest, Environment & Climate Change, Prakash Javadekar-i anogo ananü atema Nagaland semdangi arutsü aser iba mapang pai Wokha district kübok Pangti nung Molulem ozü anisüngzüka mungzükba reprangtsü.
Brihostibarnü Teqweazou, Kigwema nung Watch Tower lapoktsüdang Forest, Environment & Climate Change Minister, Dr Niekiesalie Nicky Kire-i iba osang metetdaktsü.
November 15, 2015 nü Union Minister Nagaland tonga aruba sülen Pangti-i aotsü aser idakji yipzüka Molulem ozü anisüngzükba reprangtsü, ta Dr. Nicky-isa ashi.
Teqweazou, Kigwema nung yangluba Watch Tower ji Forest Department aser Kigwema Diodiversity Trust (KBT) nati külemi yaritepa yanglu.
Tanü Dr. Nicky-i Forest Department aser KBT nati watch tower yangluba atema tenüngsang agütsü aser iba ya ajanga Japfu aser Dzukou tzükongtem nung süngdonglidong aser shirurutem wazüka ayutsü imlar, ta paisa shisem.
Forest Department-i arem-mintem National Biodiversity Areas aser Community Conserved Areas ta sangdonga wazüka ayutsü atema yimtsüngtemi Forest Department nem No Objection Certificate agütsütsüla, ta paisa ayongzük.
“Naga nunger tenem aser arem nung dang liyonga aru aser iba jagi asenoki item wazüka ayutsü mebilemer, saka asen alima tobur ajung ya bendangertemibo kanga nükshir aser reprangnür. Anungji lanurtemi arem-min aser lipoküm wazüka ayutsü atema osang proktsüla” ta Dr. Nicky-isa ayongzük.
Iba sentong nung mendenji KBT chairman Ruokuovikho Chale liasü aser Kigwema Village Council chairman Thepfüralie Zütso-i anküp tepela o jembi. Sentong nungsa MLA Vikho Yhoshü, Principal Secretary (Forest) NN Zhasha, PCCF Nagaland and head of Forest Management, M Lokesawar Rao, DFO Kohima Sidramapa aser Japfu Christian College Principal, Visakhonu Hibo nungeria o jembiogo.