Union Railways Ministry-i ‘Rail Humsafar Saptaah’ Hopta amonger

Indian Railways ajanga mapatong balala nung takok ngua aruba ajanga Union Ministry of Railways-i ‘Rail Humsafar Saptaah’ ta ser hopta tepiyong parnoki inyaktetba temaitsü sayua amungtsü tenzükogo.
Iba mapatong ya May 26, 2016 nungi tenzük aser June 1, 2016 nung tembangtsü. Centre nung NDA sorkar arur küm ana ajungba den repa iba Rail Humsafar Saptaah sentong ya amunger.
Hopta tepiyong yamai sentong balala lemsar  mongyonga aor:
Swachchta Diwas: May 26, 2016 nü train aser train station ajak merüka mongogo. Iba anogo dangji ‘Swachchta Diwas’ ta jar mongogo.
Satkar Diwas : May 27 nü Rail ketdangsertem Train aser Train station ajak nung tajemtsü tzü junga yua ali mali repranga senzüogo. Iba anogo dangji ‘Satkar Diwas’ ta ja mongogo.
Sewa Diwas : May 28 nü train shia nung ketdangsertem shimteta train nung class balala nung senzüsenpongertem den sensaksemogo. Iba anogo dangji ‘Satkar Diwas’ ta jar mongogo.
Satarkata Diwas : May 29, 2016 nü Zonal Railways ajak nung mapang shitak amshitsü aser ticket shitak lir mali item ajakji repranga jajatsü. Iba anogo dangji ‘Satarkata Diwas’ anogomong ta ajatsü.
Saamanjasya Diwas : May 30, 2016 nü teshimtet teloki railway kiyongtem merük mejua amungtsü. Aser railway kiyong aser station kima nungji tajemba agi süngdong 1000 bosa atemtsü. Iba anogo dangji ‘Saamanjasya Diwas’ anogomong ta ajatsü.
Saamanjasya Diwas: May 31, 2016 nü DRMs aser GMs purtemi train nung khu tululu belena shishilembartem den shisadokten akatsü  aser iba sentong nungji ketdangsertemi khu belenshiba maparen inyakyim len aika sayutsü. Iba anogo dangji ‘Sanyojan Diwas’ anogomong ta ajatsü.
Sanchaar Diwas :Jun1, 2016 nü DRMs aser GMs purtemi hopta tepiyong asalendong balala komasa inyak, ibaji reprangshia jajatsü. Iba anogo dangji ‘Sanchaar Diwas’ anogomong ta ajatsü.