United Brothers-i 2nd summer sixer cricket tournament kokogo

Match Patron N.Limameren Lkr den 2nd Summer Sixer Cricket Tournament akoker United Brothers aser tayongertem senpet agütsüba sentong temer külen külemi noksa nung angur.Mokokchung, 29th June, 2017.

Mokokchung, June 29 (TYO): Titans Cricket Club-i District Jail semdangtsü nükjidong yur ayongba ‘2nd Summer Sixer Cricket Tournament’ June 27 nungi tenzüka anogo asemnü tashi yangi Imkongmeren Sports Complex Mokokchung nung asayaa mungogo.
Taküm iba asayamung nung telok 14-i shilem agia liasü aser item rongnung tesüsabuba jenjang tongteterji United Brothers o KKK telok na liasü. United Brother-i runs 10 agi KKK madak takok tulu ngua taküm 2nd Summer Sixer Cricket asayamung koka liasü.
Iba asaya nung United Brothers pur mezüng batting amen, aser parnoki overs 6 nung wicket 4 tsüker runs 53 yangluteta liasü. KKK-i iba runs-ji arishitsü meranga asaya, saka parnoki overs 5.1 nung runs 43 dang yangluteter lia wicket ajak tsükadok.
Iba asaya nung United Brothers nungi asayar Atuba-i par telok asoshi runs 26 yanglutet aser bowler rongnung Akhangbai overs 2 nung wicket 3 agi aser runs 19 dang agüja tenati shilem kanga tajung agiba ajanga par teloki KKK madak takok tulu ngua liasü.
Champion telok nem tayongeri sen 20,000/- aser runner-up nema 10,000/- senpettsüogo. Iba den ano taküm jurila senpetji United Brothers nungi Atubai teimtiba agizüka liasü. Pai 2nd Semifinal aser Final Man of the Match, Most number of sixer (12 sixes), Man of the Series (149 runs & 4 wickets) nungertem agizüka liasü.
1st Semifinal man of the match-ji KKK nungi Nihal Rai-i agizük, Most Promising Player-ji Cratens nungi Sarkari agizük, United Brothers nungi Akhangi wicket 9 agiba ajanga pa nem Best Bowler senpet agütsü aser Youngest player-ji Cratens nungi arishi küm 10 tain Tiasünepi agizüka liasü.
Tatembang sentong nung BJYM Mokokchung District Tir, N.Limameren Longkumer match patron liasü.