United Naga Council-i Republic Day mokdanger

Imphal, January 22 (Agencies): United Naga Council (UNC)-i tang Manipur nung highway ana mokdanger lungkak aita arur aser tanü parnoki taruba Republic Day benjungmung mokdangtsü ta metetdaktsüogo.
“Manipur Chief Minister Okram Ibobi Singh-i anir lokti nung telemsa adokdaktsüba sorkari nübortem den asüngdangya mesüi district tasen tenet tentet,” ta UNC sangdong ka nung shia lir.
“Republic Day sentong nung Naga nunger shibai shilem agidir, pai tebilemtsü khuret abentsü” ta UNC sangdong nungsa metetdaktsüogo.
Northeast nung telungpur telok aikati Republic Day mokdangtsü atema tayongzükba agüja lir.
Manipur nung Republic Day tiptema amungtsü atema police-i tesem aika nung telungpurtem mita aoba maparen tenzüka inyakdar.
Deobarnü Manipur kübok Noney district nung National Socialist Council of Nagalim-Isak-Muivah (NSCN-IM) züngsem pezü apu aser parnok ket nungi tapoktsütem ngutetogo.
NH 37 nung jangotsü abenba truck garitem amakdang amshitsü asoshi parnoki tapoktsütem bena liasü, ta police-i ashi.
UNC-i lenmang mokdangba dak sendakba onük jembishinütsü atema Manipur sorkari UNC den olemtep alitsü jaokogo, saka tang tashi parnok nungi telangzüba kecha mali.
January 17, 2017 nü Manipur state Chief Secretary O. Nabakishore-i züluba shidi nung, telok asem tsüngda amentsüba sendenji Imphal nung secretariat nung amentsü ta shia lir.
Ajisüaka, UNC-i sendenji Delhi nung mesüra Senapati district headquarters, Manipur nung amentsüla ta ashir.
Honibarnü okadak kati UNC President, Gaidon Kamei aser Information Secretary, Stephen Lamkang na anogo 15 nü tepuokdak ayutsü tetuyuba agütsü saka tenaprongla senden nung adentsü akok ta okadakisa metetdaktsüogo.