United Nations headquarters nung Shakira-i jembi

ShakiraSeptember 23, 2015: Pop kentener Shakira-i Mongolbar nü New York nung United Nations (UN) Headquarters semdanga alima nung tanurtemi tebilemtsü ajuruba onük jembiogo.
‘Hips Don’t Lie’ ken atenla Shakira ya United Nations Children’s Fund (UNICEF) atema Goodwill Ambassador lir aser lai U.N Secretary-General Ban Ki-moon den külemi UN indang Big Apple base nung sentong ka nung shilem agia liasü.
Iba sentong nung shisaliok atema teyari agütsüba Barefoot Foundation tenzükla Shakira-i alima lenirtem dang tanurtem, sensak tia koktettsü atema ano taliba meranga inyaktsüla, ta ayongzük.
Shakira-i, “Tanur million 100 dak tema school-i maor aser arishi küm 5 tekübok tetsür-tebur million 159 chiyungtsü tajung mashiba ajanga shi aser shisatsünaprongla nung tanga memenepi lir. Küm süia ao shia asenoki tanur asüba mapang terenlok aser item onüktem atema senotsü aika mintoker, tanur million aika kasa sensak tia aser maongka junga mangutsa sotettsü,” ta ashi.
“Iba anema UNICEF aser ni longjemogo aser iba yongji tanü onok yangi lir, kechiyong tanur asüdang sen inoktsüji kanga rongtak aser tongtibang, mapang amajok nung mesüidaktsütsüla,” ta laisa ashi.

You must be logged in to post a comment Login