United Nations-i Myanmar & Thailand aitsür

Bangkok, May 27 (Agencies): Myanmar aser Thailand nati Turkey-i nisung ka meyipa yokba atema United Nations (UN)-i aitsüogo.
Yaküm Turkey tir atsüngdoktsü merangba nung tai tonglokja alisang Fetullah Gulen den tesentaktep lir ta tai tongloktsüba atema nisungji Turkey nem agütsü.
Muhammet Furkan Sokmen ji Yangon nung aliba international school ka nung accountant inyaka liasü aser tesüiba ita ishika tsüngda Southeast Asia nungi pa zünga nisung trokbuba Turkey-i meyipa yokogo, ta UN-i metetdaktsü.
“Turkey nung parnok taküm lendongi aitsü ta UN Human Rights Office-i khuret süa bilemtsür. Parnok dak human rights anema mapa inyaktsü aser reshikangshitsü akok” ta UN indang Southeast Asia office-i sangdong ka nung ashi.
US nung sayutsüngir Gulen-i July 2016 nung Turkey tir Recep Tayyip atsüngdoktsü atema tasa atonga inyak ta Turkey-i aitsür.
Iba tatalokba sülen Turkey ketdangsertemi Gulen pusemertem anema mapa inyaktsü tenzük aser parnoki nisung 100,000 dak tema apu mesüra mapa nungi anentsüogo.
Muhammet ya mezüng May 24, 2017 nü Yangon airport nung par kibong den lia apu.
Idak nungjagi pa Thailand-i anir ao aser ghonda 24 shi ayuba sülen Hokolbarnü Turkey-i yok.
Yangon nung Horizon International School indang kongsang asem shibangtsüba sülen anogo ishika lir Muhammet apu. Pa iba school nung accountant inyaka liasü.
Turkey nung sorkar atsüngdoktsü merangba sülen police-i Horizon International School-i kiralongrar teloktem den tesentaktep lir ta onük nung ajemdaker bushisüngdang ka tenzük, ta Myanmar magazine Frontier-i metetdaktsü.