United Nations-i Syria yimjung sentong agizüka nungitsü nangzüker

US Secretary of State, John Kerry (Tiyongtsü)-i Russia Foreign Minister, Sergei Lavrov (Achijilen) aser UN Secretary General, Ban Ki-moon na den aroki New York yimti nung ayongba Syria yimjung senden nung shilem agiba noksa nung angur. (New York, December 19)

 United Nations, December 19 (Agencies): United Nations Security Council (UNSC)-i Syria yimjung sentong agizüka kasaji nungitsü tenangzükba olen ka metetdaktsüogo.

Yashi UN tesepti, New York nung ayonga amenba Syria yimjung senden nung shilem agirtemi Syria nung rarabaren anenja Tir Bashar al-Assad-i aniba Syria sorkar aser sorkar anemer na tsüngda yimjung tenzüngzüktep agitsü ajungshitsü lemteta liasü.

UN-i ketdangsüa, iba yimjung tezüngzüktepji agidaktsüba sülen Syria nung sorkar tasen tentettsü asoshi maneni ajungshitsü telemtetba yashi agiogo.

Küm 4 tejaklen nungi tenzüka Syria sorkar aser sorkar anemer na tsüngda tongpang kanga sashia raraba ajanga nisung 250,000 shi tepseta lendong ataloka tensa mejungi akümbaren agientsütsü nükjidong nung International Syria Support Group (ISSG)-i Vienna nung senden anaben tashi amenba sülen yashi New York yimti nung senden amener lir.

Syria nung mangatettep adokba teloktem rong nung yimjung tezüngzüktep agitsü, Syria sorkar aser sorkar anemer na tsüngda jembitepba senden amentsü aser taruba küm 2 tashi nung teloktep sorkar tentetba sülen election agia par sorkar tasen tentettsü ajungshitsü asoshi ISSG-i tan lemtetogo.

“Syria nung tongpang rara nisung tepsetba maparen anentsü aser nübur taküm jenjang tajungba kümtsütsü maparen inyakdaktsütsü telemtetba tan ISSG-i agiogo,” ta US Secretary of State, John Kerry-ia metetdaktsü.

Syria sorkar aser sorkar anemer na tsünga ita ka tsüngda nung yimjung tezüngzüktep agidaktsütsü telemtetba ka ISSG-i yashi senden nung agiba osanga jangjaogo.

“Syria sorkar aser sorkar anemer nati sangküm, 2016 küm January ita nungi tenzüka yimjung senden amentsü akok,” ta Kerry-i shisem.

Ano külen, tang Syria aser kidangsüa aliba Iraq linük na indang lushi shilem tuluba agia lendong atalokdaktsüba kiralongrar telok tettsüti, Islamic State (IS) anema maneni raratsü telemtetba ka yashi senden amenertemi agiogo.