United North Block nung alirtemi DMC garitem noktang

Hombarnep United North Block, Burma camp nung alirtemi noktangba ajanga Burma camp gari lenmang tezülen DMC jana endokba truck garitem anendenba noksa nung angur.

Dimapur, February 1 (TYO) : United North Block, Burma camp nung alirtemi Hombarnep DMC dumping ground-i municipal truck garitem aotsü noktangtsü tenzük saka bangdak department- Municipal Affairs Cell-i tenangzükba agiba sülen iba tenokdangba agienogo.

Tang aliba DMC dumping ground tesem belenang ta takhangba agüja United North Block nung alirtemi trick garitem noktangtsü sentong ayongzük. United North Block kübok kiyong tenet lir aser parnoki ashiba agi DMC dumping ground ajanga iba tesem nung alir nem timtem aika bener arutsür.

Taoba mapang department-i nangzükba ama mapa meinyakba agi February 1, 2016 nungi parnoki municipal truck garitem noktangtsü telemtetba agia liasü.

Tanep colony council züngsem ajak Veterinary colony lenjem nung adenshi aser idakji DMC gari ka dang mesüidaktsüi noktang. Iba jagi Veterinary colony lenmang tezülen jana abenba truck gari ajak anendentsüsa aküm. Tanü 12:00 ako meta Municipal Affairs Cell (MAC) Parliamentary secretary, R Tohanba-i mapa inyaktsü nangzükba sülen ang tenokdangbaji agien.

Tanep Municipal Affairs Cell (MAC) Parliamentary secretary, R Tohanba aser Secretary MAC Maongwati Aier (IAS) na Kohima nungi alur colony council züngsemtem den ajurutepa senden ka agi.

Colony council züngsemtem den senden alidang Tohanba-i ashiba agi, department indang inyakyim nung kimung ka alir jana toktenba kija masü, saka department-i alizükba kimung kaji mezüng State Level Land Acquisition committee nungi temelaba angutsüla.

Iba dak sendakba indang paper works tenzükogo aser February ita tashi nung tembangtsü imlar. Taküm March ita tetenzüklen tashi nung jana endokdak tesem tasenbai belentsü, anungji ibaji masü tashi tenokdangba agientsü mepishir, ta Tohanba-isa United North Block nung alirtem dang ashi.

Iba senden nung Dimapur SDO (C) Moa Sangtam, CEO, DMC Atokhe Aye, Dimapur district police aser timtem ajuruba colony council züngsemtem aden.