University 6 nung yoga department lapoktsü : Irani

New Delhi, June 18 (Agencies) : Taruba academic year nungi central university 6 nung yoga departments tasen lapoktsü mesüra yanglushitsü aser küm ka tsüngda university 20 nung lapoktsü sentong lir.
‘National Seminar on Yoga’ nung iba osang ya HRD minister, Smriti Irani-i metetdaktsü aser laisa reju nung tekolakpurtem dang yoga indang tajangzük kulitem agütsüba nung yariteptsü ayongzük.
“2016-17 küm nungi yoga department tasem mesüra yanglushitsü atema telemtetba ka agiogo. Küm ka tsüngda nung yoga department 20 tashi lapoktsü” ta Irani-i shisem.
Taruba session nungi yoga department tasemtem lapoktsüba rejutemji, Hemwati Nandan Bahuguna Garhwal University (Uttarakhand), Visva Bharati (Shantiniketan), Central University of Kerala, Indira Gandhi National Tribal University (Amarkantak), Manipur University (Imphal) aser Central University of Rajasthan lir.
H R Nagendra-i aniba luden kati yogic sciences atema certificate courses nungi tenzüker Bachelor’s, Masters aser PhDs agütsütsü atema tebilemba shidanga lir aser iba den liromedema tanü Irani-i iba osang metetdaktsüogo.
Nagendra ya Prime Minister Narendra Modi indang yoga guru ta züngshir aser tanü sentong nung pa-a aden.
Irani-isa ashiba agi UGC-i yogic sciences atema NET exam enoksemtsü atema tebilemba lir aser ibaji ajanga iba subject atema tesayurtem bushiba khuret koktettsü.
Tanü agiba sentong nung HRD ministry nung Secretary Higher Education, V S Oberoi-ia ashiba agi, International Day of Yoga nüngtem nung linük kübok institutes aser University balala nung anogo asemnü yoga benjungtem amungtsü.