University tem dang ‘Swachh Bharat Mission’ kaket agitsü tuyur

New Delhi, November 15 (Agencies): University Grants Commission (UGC)-i university tem dang Swachh Bharat Mission (SBM) indang kaket agitsü atema tetuyuba agütsüogo.
Iba kaket ya ‘The Swachh Bharat Revolution’ lir aser iba nung küm pungu tashi inyaka aruba osangtem zülua lir. Kaket nung jeli o ji Prime Minister Narendra Modi-i zülu.
UGC Secretary Rajnish Jain-i Vice-Chancellor tem dang shidi ka züluba nung Swachh Bharat Mission mapa inyakba ya prokshitsüla ta shia lir.
Shidi nungsa UGC kübok aliba Higher Educational Institutions aser affiliated college temi SBM indang kaket agitsü aser iba nung aliba osang lemsateptsü shia lir. Harper Collins India-i menüngba kaket ka kaketshirtem aser staff nem agüjang ta UGC-isa ashi.
Iba kaket ya Ministry of Jal Shakti-i adok aser wadang balala nungi nisungtemi SBM nung shilem agiba indang osangtem zülua lir.
Tawa tu, SBM-isa college aser university tem dang convocations dena sentong balaka amongdang Khadi-i arrba aben-süoshitem amshitsü atema tetuyuba ka agütsüogo.
Prime Minister-i Khadi amshitsü ayongzükba aser UGC-i iba ya asentenshia amshitsüla ta shidi nung shia lir.
Mahatma Gandhi-i nüjiso atema raradang Khadi ya prangpong ka ama amshi, anungji iba dang ‘Liveries of Freedom’ ta ajar. Tatsük-talem tesem nung ‘Khadi’ ya kanga tapet lir aser iba amshiba ajanga India nungeri pei sobaliba aser senso asüba atema nüma atangtsü, ta UGC-isa sangdong nung metetdaktsü.