University tem nung Northeast Tribal oshitem study tenzükogo

Kohima, August 18 (TYO): Nagaland Angh, P.B. Acharya-i achaayanga tanga university tem nung North Eastern Tribal Dialects study tenzükogo, aser iba dak sentakba nung Raj Bhavan sangdong ka nung, pa Angh makümdangyongi lokti tenzüker aser Mumbai University nung yimtenren nung inyaker ka ama pai pa tajungtiba agi University balala nung tribal oshitem benoktsü merangogo, ta metetdaktsü.
Tang Angh ka ama pai August 12, 2016 nü par jila, Mangaluru nung aliba Nitte University nung tribal dialect tenzüktsüogo, kong kaketshir 20000 züngdar.
Nitte University-i tribal oshi pezü-  Assamiya, Mao, Meiteilon aser Khasi nung certificate programme agütsütsü.
August 15, 2016 nü Angh-i, Mumbai University nunga tribal dialect study benokogo ta metetdakja liasü. Ano university trok- Manipal, Mangalore aser ALVA college (Mangaluru), SNDT (Mumbai), Pune nung Symbiosis aser Karve nunga iba study benoktsü. Mangalore/Udupi ya Angh P B Acharya asoba tesem lir.
Tang iba Manipal University nung Vice Chancelor teinyakdakji iba University nung mezüng azüngertem rongnung ka lir.
Iba dak sentakba nung Angh-i Naga nunger ajak dang, talisa kaketshirtem dang tanga oshitem angazüktsü ajungshiogo. Alima ya ka dang akümer aser tanga oshitem angazüktsüji tongtibang kümogo, ta kasa sangdong nungsa shia lir.
Nija ka maitsüji mezüngbuba tetsü oshi, loktiliba aser sobaliba maitsü lir. Asen linük ya  Democratic Republic lir aser senso ajak kasa dang. Democratic linük ka nung nisung ka dak kati ka akhümtsübutepba aser pei oshi akhümtsübuba lir.
Tangbo tribal oshitem sayutsü atema university kecha nunga Department ka mali. Tanga oshitem angazükba ajanga aseni nisung ka shisatsü telung tonga iteter. Sobaliba balala angatetbaji- oshi jembitsü tashi aliba nisung ka nungi tenzüker aser ibaji ajanga nija ka nem tashi agüja ajungmesor, aser iba ya tang Northeast nung tenüngdaktsü ka kümogo, ta  Raj Bhavan sangdong nungsa shia lir.