Universtiy kaketshirtemji takoktet asutsüla: Acharya

December 05, 2015 nü SASRD, Medziphema Campus nung Nagaland Angh, PB Acharya-i Nagaland University 4 buba Convocation nung degree lema agütsüba noksa nung angur. 

Dimapur, December 5 (TYO): Nisung ka asoshi angazükba inyakyim ya taküm piyong atema lir aser kaketshirtemi degree ka angubaji pei taküm tenzüker ama lir, ta Nagaland Angh P.B Acharya-i ashi.
SASRD, Medziphema campus nung Nagaland University 4 buba Convocation sentong nung o jembidang Angh aser Nagaland University nung Chief Rector, Acharya-i iba ya ashi.
“Na degree ka anguba jagi na angazükba tembanger ta nenoki tebilem. University nung züngtemba lanurtemji takotet nisungtem asütsüla. Shia meteter aser tazünger lanur ka dak lokti atema inyaktsü tebilemtsü khuret tulu lir aser shisaliok bushibaji pei atema dang masü saka lokti atema asütsüla” ta Acharya-isa metetdaktsü.
Paisa, degree aser gold medal balala anguba kaketshir ajak nem tenüngsang agütsü.
University temji shisaliok agütsüdak tongtibangtem lir saka tanü tensa nungbo University temji shisaliok agütsüdak dang masü saka terenlok atema Nodal Agency ama inyaktsüla, ta Acharya-isa ayongzük.
Iba sentong nung tetushi süa jaokerji Nagaland Chief Minister, T.R Zeliang liasü aser pai o jembidang ashiba agi, “taoba mapang Nagaland University nung mepetmesü aika liasü saka tang iba tensa toktsür tajungba küma aoba atema tenüngsang agütsür.”
“Nagaland University lapoker küm 21 tashi arudang University ajanga state nung higher education jenjang tajungba yanglushiogo. Ibaji ajanga asen lanurtem alizüng tuluba ayutsü ajungmesogo,” ta TR Zeliang-isa ashi.
Nagaland University ya Central University ka lir saka kiojen, University administration, academic quality, curriculum aser research dak sendakba maparen nung metokmeperi aika lir aser item asoshi asenoki mapa inyaktsü nüngdaker. University-i tesüiba küm 21 tsüngda inyaka arubatem meyipa reprangshitsüla aser University inloktsü atema asameyanga inyaktsüla, ta Nagaland chief minister-isa ashi.
Paisa takok angurtem dang lokti nung temelenshi bener arurtem asütsü ayongzük.
Tanü agiba sentong nung Vice Chancellor, Prof. B.K Konwar-i University indang osang metetdaktsü aser Nagaland University Chancellor aser Convocation Chairman, Prof. D.N Buragohain-i tesentepertem pela agizük.
Iba sentong nung Union minister of Human Resource Development, Smriti Irani adentsü sentong liasü saka la ajungbena temang nung timtem kar ajuruba ajanga marutet.
Sentong nung School Education Minister, Yitachu aser Parliamentary Secretary tem rongnungi – Dr. Benjongliba, Amenba Yaden, S. Chuba, Panteang, Deo Nukhu, Er. Levi, MLA tem rongnungi – Tovihoto aser Zhaleo Rio nungera denogo.