UNLF tekolakba Meghen Imphal tonga aruogo

Kolkata, Yimpoksüi/November 28 (Agencies): UNLF mendenbuba RK Meghen, küm ter tepuokdak aser küm semer atsükshishia senzüba sülen nüjiso ngur Manipur-i meyipa aruogo.
Pa par jabaso RK Chinglen den Brehostibarnü Indigo Airlines tayimtsü nung Imphal, Tulihal airport 1:27 nung atong.
UNLF lenir ya airport kima meira paibi organizations balalai pelashishia agizükogo. Pai Kangla aser Hicham Yaichampat semdanga aküm tetushi agütsütsü.
Meghen shiba 1975 küm Manipur toktsür ao, pa 2010 küm Bangladesh Police-i pur India nem bendanga agütsü.
Pa tepuokdak küm 10 aliba sülen November 9 nü chiok.
“Küm 44 lir chichiba lisopur ka kidangi meyipa aruba atema onok kanga pelar,” ta Poirel Leimarol Meira Paiba nungi Longjam Memchoubi-i ashi.
“Manipur asoshi taküm bendanga agütsüba jabaso kidangi meyipa arutsü onok ataa liasü,” ta lai airport nung ashi.
Guwahati central jail nungi chiokba sülen Meghen, Novemeber 10 nü central agencies-i Delhi-i anir ao aser pa Delhi nung shinga nema memetetdaktsüi guest house ka nung yua liasü.
Home ministry ketdangsertemi ashiba agi, pa Delhi-i anir ao kechiyong Manipur-i pa meyipa aotsü asoshi mapang tetemsü masü asü.
Human rights activist kati Manipur Human Rights Commission dangi arbitrary detention dak sendakba nung ken o ka benok.
Meghen kechiba tangbo kidangi aotsü mela, iba idang osang tejangja mali aser pa India sorkar ketdangsertem den ken o junga lemtep melemtep ajia mejangja.