Unnao aser Shahjahanpur tatalokbatem ajanga BJP tenüng menüktsür: Congress

Patna (Bihar), September 19 (Agencies): Brihostibarnü Congress party-i, Unnao aser Shahjahanpur nung tetsür tashiyim amshia raksatsüba ken otem ajanga BJP pur indang ‘Beti Bachao-Beti Padhao’ campaign tenüng menüktsür, ta metetdaktsü.
Congress-isa, item ken o nung kechiba BJP sorkari ola madoker, ta asüngdang.
Shahjahanpur tatalokba ken o nung Uttar Pradesh sorkari tim obendang magütsür, ta Congress-i aitsü.
Tanü Patna nung osangbenertem den jembidang Congress otongdar, Sharmishtha Mukherjee-i, “Tai tonglokja alisang Chinmayananda (BJP lenir) sademsadema senzür aser takoksa angulabo taküm lendong nung lir, iba dak alia kulitem raksatsütsüsa lir,” ta ashi.
Congress otongdarisa, BJP sorkar aser par lenirtemi parnok indang ‘Beti Bachao Beti Padhao’ campaign takok ngua agidar ta jembir, ajisüaka külenbo Shahjahanpur nung tashiyim amshia raksatsüba ajanga takoksa angulabo soseta asütsü amokmerener, ta ashi.
“Unnao aser Shahjahanpur na nung tashiyim amshia raksatsüba ken otem ajanga BJP pur ‘Beti Bachao-Beti Padhao campaign’ tenüng menüktsür,” ta Sharmishtha Mukherjee-i ashi,
Sharmishtha Mukherjee-isa, iba ken o dak sendakba nung Uttar Pradesh Chief Minister, Yogi Adityanath-i ola madokba atema aitsü.
“Kechiba Yogi [Adityanath]-i ola madoker? Ato kilonser aser Amit Shah natia ola madoker. Kechiba BJP lenir tetsürtem aser tetsür MP temia ola madoker?” ta lai asüngdang.
“Takoksa angulai temelung ulua tashi tulu aliba yimtenren lenir anema ken o agütsüogo. Takoksa angula aser la tebu na danga ghonda 11 tashi asüngdangyaogo, ajisüaka tang tashi tai tonglokja alisang anema kecha meinyaker,” ta laisa ashi.
Ano Congress lenir, Priyanka Gandhi Vadra-ia kasa ken o nung BJP sorkar aitsü.
“Unnao nung tashiyim amshia raksatsüba ken o nung BJP sorkar, police tashimait aser tai tonglokja alisang kümzüka ayuba yimjak nung ajaki metetogo. Tang Shahjahanpur tatalokba ken o nunga BJP sorkar aser UP police-i kasaji inyaker. Takoksa angula tetsübu nung lir saka BJP sorkar kechi atar’ar memeet,” ta Priyanka-i twitter ajanga metetdaktsü.