Unnao: BJP MLA Kuldeep Sengar police ket nung anogo 7 ayutsü

New Delhi, Rongchii (April) 14 (Agencies): Uttar Pradesh kübok Unnao district nung arishi küm 17 tain tetsür ka dak tashiyim agi shi nung medemba atema tai tonglokja alisang BJP MLA Kuldeep Singh Sengar Küptoknü (Honibar) anogo tenet police ket nung ayutsü atema temelaba agütsüogo.
CBI-isa tetsürla Sengar dangi anir aosang Shashi Singh puogo.
Rogonü (Hokolbar) CBI-i BJP MLA Kuldeep apu aser pa Lucknow okadak kati anir oa jen o benok. Idangji Kuldeep-i pai aibelena kecha meinyak aser ozüng amertem dak temulung alemer ta ashi.
Tanü tetsürlaji CBI zonal office-i aru aser idak nung jagi Ram Manohar Lohia hospital-i temang tendangtsü atema anir ao.
Prime Minister Narendra Modi-i aibelenertem merenshitsü ta sangoktsüba sülen tetsürlai temeten angutsü ta temulung alemba agi Lucknow-i aru ta ashi.
Yashi PM Modi-i linük nung jalatem nem temeten agütsütsü ta metetdaktsü. “Aibelenertem odang meyutsütsü, temeten agütsütsü. Asen jalatem nem temeten agütsütsü” ta Modi-i New Delhi nung rally ka nung jembidang ashi.
Taoba hopta tetsürlai Chief Minister Yogi Adityanath’er kima nung la sasa rongsenttsü merangba sülen iba osang ya linük ajungai meteta aküm.
Police-i BJP MLA anema mapa kecha meinyaker ta tai tonglokja tetsürlai la mi agi rongsettsü telemtet agi.
Iba ken o atema mapang shitak nung mapa meinyakba atema nisungtemi Uttar Pradesh aija aru aser talisa tetsürla tebu tepuokdak lia asütsüsa tensa ka ajruuba agi UP sorkari iba ken o CBI nem bushisüngdang südaktsütsü atema agütsü.
Yangtepnü (Brihostibar) Kuldeep Singh Sengar anema FIR ka benok aser iba sülen pa UP Police-i IPC kübok ken o aika nung tai tongloktsü.
Samajwadi Party tanishir aser taoba chief minister Akhilesh Yadav-i state director general of police (DGP) aser Principal Secretary (Home) nati tai tonglokja aliba MLA kümzüktsü merang ta aitsüogo.
“DGP aser Principal Secretary (Home) nati tai tongloktsüsang kümzüka ayu. Tenati MLA dang ‘mananiya’ (akhümtsübua aliba) ta jembiba linük ajungai nguogo” ta tanü SP office nung Akhilesh-i ashi.
“Iba sorkar yagi nübortem aser opposition party lenirtem dak tashiyim mapa inyaker” ta paisa shisem.