Unnao tatalokba onük nung Lok Sabha nung opposition-i longkak ait

New Delhi, Chiteni/July 31 (Agencies): Unnao (Uttar Pradesh) nung BJP MLA kati tashiyim amshia taküm raksatsü, ta tai tonglokja alila truck agi tsüksettsü merangba onük nung tanü Lok Sabha nung Congress densema opposition party balala nungi züngsemtemi longkak aita senden nungi ayazüka ao.
Congress densema opposition party temi, tetsürla tepsettsü merangba onük nung sorkari telangzüba agütsütsüla, ta takhangba agüja liasü.
Iba onük süoka Lok Sabha nung Congress lenir, Adhir Ranjan Chowdhury-i, opposition-i iba onük aiben süokaka Union Home Minister, Amit Shah-i telangzüba magütsür, ta ashi.
Pai ashiba agi, CBI-i bushisüngdang tenzükogo ajisüaka tetsürlar kibong züngsemtemi parnok taküm lendong nung lir ta shiogo.
Tesülen Congress, DMK, NCP aser IUML nungi züngsemtemi senden nungi ayazüka ao. Congress lenir, Sonia Gandhi-ia senden nungia ayazüka ao.
Uttar Pradesh nung nisung ka rongseta südaktsüba tatalokba nung RSP lenir, N K Premchandran-ia senden nungi ayazüka ao.
Taoba Amongnü Rae Bareli (Uttar Pradesh) nung truck kati BJP MLA anema tai tonglokja alila, lar kibong züngsemtem aser lar lawyer mena aliba gari dak arua tsükoktsü aser iba lendong nung lar kinünger ana asü aser la den lar lawyer na kanga mejungi yirua liasü.
Iba tatalokba nung ajemdaker Police-i BJP MLA, Kuldeep Singh Sengar den tangar nisung 10 anema nisung tepsetba ken o benokogo.