Unorganised Sector nung inyakertem atema Legal Camp katsü

Kohima, Aenjeti 31 (TYO): Kohima nung anogo asemnü (Aenjeti 29-31) unorganized sector nung mapa inyakertem atema ayongzükba Legal Services Camp “Special Camp for workers in Unorganised Sector” nung nisung aika denogo; iba camp ya Nagaland State Legal Services Authority (NSLSA) den Labour Department NBOCW, Welfare Board-i ayongzük aser District Administration aser Kohima District Legal Services Authority nati yaritepa liasü.
Iba camp ya Jakhama SDO (Civil) Office nung Aenjeti 29 nü agi, Sechu Zubza nung Aenjeti 30 nü aser Indra Gandhi Stadium, Kohima nung Aenjeti 31 nü agia liasü.
Iba camp ya NALSA Legal Services to Workers in Unorganised Sector, 2015 dak sendakba nung ayongzükogo.
Iba camp nung Kohima district kübok yim 59 nungi kisü-jensü mapa inyakertem aden. Iba scheme kübok parnok nisung 409 tenüng züluoka liasü.
Iba camp semdangba mapang Gauhati High Court Judge aser Executive Chairman NSLSA, L.S. Jamir-i mapa inyakertem tim department den sendakteptsüba atema Panel Lawyers aser Para-Legal Volunteers densema shilem agir ajak nem tenüngsang agutsü.
Paisa iba camp nung shilem agir department balala dang mapa tajung inyakba atema pelaba lemsatepa liasü.
Assistant Labour Commissioner, Avile Vetso aser Project Officer NBOCW (Welfare Board)-i kisüjensürtem dang Building and Other Construction Workers’ Welfare Scheme kübok tajangzük balala indang metetdakja liasü.
2018 küm awareness agutsüba dak alia NSLSA-i sensakertem dak rangloker service balala agütsütsü sentong lir.