UNSC-i IS & Al Qaeda na rongsen lenmang shibangtsütsü lemteter

United Nations, December 18 (Agencies): United Nations Security Council (UNSC)-i Islamic State (IS) aser Al-Qaeda kiralongrar telok na indang rongsen lenmang shibangtsütsü telemtetba ka agiogo.
UNSC nung züngsemba linük 15 nungi finance minister-tem ajungai yashi, Brehostibar nü mezüngsüa ajurutepa senden ka amenba sülen IS aser Al-Qaeda kiralongrartem indang rongsen lenmang nokdanga kasaji shibangtsütsü lemteta liasü.
Tongti kiralongrar teloka ana indang rongsen lenmang shibangtsütsü den külemi, par telok nung tongti lenirtem indang tarsensen tasenba küma yanglushitsü telemtetba agiba osang jangjaogo.
US Treasury Secretary, Jack Lew-i aniba senden nung shilem agirtemi pei linük lushi telung nung telok aser tentet balalai kiralongrar telok ana nem teyari sen agütsübaren aser kiralongrartemi tashiyim agi rongsen khangzükba maparen ajunga nokdanga kasaji anentsütsü lemtet.
Ano, kiralongrartemi par senotsü belenshibaren mita kasaji nokdangtsü atema par linüktem rong nung kiralongrar den sentakba miim osangtsüsang lemsateptsü asoshi yashi senden nung shilem agirtemi azüngashiogo.
Nübur nem lendong bener arutsütsüsa Improvised Explosive Devices (IEDs) aser iba ama pokshitsü osettsüset yangluba maparena nokdangtsü asoshi linük shiai mita osangtsüsang agitsü telemtetba parnoki agia liasü.
“Tanga kiralongrar teloktem ama mesüi, IS teloki alima tesem balala nungi senotsü teyari mangur saka par teloki tashiyim agi agiba tesemtem nung rongsenren maparen balala inyakba ajanga par teloki nungdakba rongsen angur,” ta Lew-i yashi senden nung metetdaktsü.
IS teloki tashiyim agi agiba tesemtem nung tentetba bank nunger nungi senotsü rakzüka agiba aser totzü tutetdak balala nungi totzü tuteta bendanger dang ayokba osang bushiteta lir.