UNSC-i N Korea anema tenokdangba sentong benokshitsü amokmerener

United Nations, September 10 (Agencies): United Nations Security Council (UNSC)-i North Korea anema tenokdangba sentong taoba mapang nungi tesashiba benokshitsü amokmerenba olen ka tanü, Honibar nü metetdaktsüogo.
N Korea-i United Nations (UN) aser alima ashi mangai, par 5 buba aser tesahitiba tongpang nung amshitsü nuclear oset yashi, Brehostibar nü tendanga kadokba sülen UNSC-i Pyongyang anema tenokdangba sentong benokshitsü amokmerenba olen ya sangoktsür lir.
Pyongyang-i par nuclear tongpang oset tendangba osang angazükba sülen alima linük 15 tashi züngsemba UNSC-i yashi rongdak senden ka mena, Pyongyang nem tapet telangzüba agütsütsü lemteta liasü.
“N Korea-i par tongpang nung amshitsü nuclear oset tendangba ajanga par linüki UNSC telemtetba anema inyakba den külemi, alima jenjang nung tensa mejungi kümdaktsütsü tenzükogo,” ta shia, UNSC-i Pyongyang kanga sashia aitsü.
“Pyongyang-i ozüng alema inyakba nem tapet telangzüba agütsütsü asoshi UNSC-i nungdakba maparen inyaktsü,” ta par tenteti metetdakja liasü.
“Tongpang nung amshitsü nuclear osettsüset yanglua kasaji tendanga kadokba maparen anentsü atema aiben ajungshi aka, Pyongyang-i par nuclear tongpang oset yanglua tendangba ajanga alima temzüng anema inyaker aser par linüki alima mezüngmeshia, rara menatsü meranger,” ta shia, N Korea anema tenokdangba sentong tasen benokshitsü asoshi US aser France nati yashi senden nung takhangba benokba osanga angazükogo.
“Alimai Pyongyang nuclear tashi abener linük ka kodanga mekümdaktsütsü ta osang tejangja sangoktsütsü mechi UNSC-i tapet telangzüba agüja, par linük anema taoba mapang nungi tesashiba tenokdangba sentong benokshitsü akhanger,” ta US’er UN Ambassador, Samanth Power-i yashi senden nung benok.
“Tan aliba tensa dang nungi tamajungba mekümdaktsütsüa alima linük aser tentet shiai kechisarena ajunga kümdangshia inyaktsü ajungshir,” ta China’er UN Ambassador, Liu Jieyi-ia ajungshia liasü.
“N Korea nem par inyakyim yari temerenshi agütsütsüla kechiyong par linüki tan tesüsa par nuclear tongpang oset kadoka tendangba ajanga alima anema inyakogo,” ta France Ambassador, Franois Delattre-ia metetdaktsü.
“Pyongyang-i alimai magizüktettsüsa aser alima tensa mejungi kümdaktsütsüa mapa inyakba den külemi, par linüki UNSC-a kanga mezüngmeshiogo,” ta shia, UN Secretary General, Ban Ki-moon-ia N Korea aitsüba olen ka metetdakja liasü.