UNTABA-i Nagaland aser Assam arrtsü bentettsü akhanger

Dimapur, February 26 (TYO) : Nagaland aser Assam arrtsü mangatettep ken o bentettsü atema UNTABA-i kanga dang nendaka mapa inyaka arur aser tang tashi nung Centre o State lennirtem, tangartem aser ozüngren metetetertem den ajurutepa tebilembatem lemsatepogo, ta tanü United Naga Tribes Association On Border Areas sangdong ka nung metetdaktsü.
Iba dak alia State sorkari aiben Consultative meeting nung adentsü jaokba ama UNTBA-i denogo, ta UNTABA Charman, Hukavi T Yeputhomi aser General Secretary, Imsumongba Pongen nati sangdong ka nung metetdaktsü.
Arrtsü ken o ya yimtenren telemtetba ka ajanga bentettsüla ta Naga nungertemi bilemer, kechiyong Nagaland ya India linük kübok state 16 buba lir. Nagaland state ya yimtenren tsütsü mulunga agizüktepba sülen aküm aser iba mapang Linük Temzüng nung Arrla 3 & 4 kübok agüja aliba onüktem nung ajemdaker arrtsü ladangtsü lemteta ayu, ta UNTABA mendenpurtemisa ashi.
Arrtsü indang onük atema UNTABA-i taoba sorkar nung Chief Minister, Cabinet züngsemtem, MP tem, Chairman DAN aser President NPF nunger den ajurutepa iba onük lemsatepogo. Ajisüaka, onoki nendaka inyakaka, Nagaland sorkari UNTABA takhangba ama mapa meinyaki lir, ta UNTABA sangdong nungsa metetdaktsüogo.
Akhidang nungi Naga nunger litsü koba tang Assam nung lir, iba ya Nagaland state nung zükloktsü atema India Parliament-i ’16 Points Agreement’ of 1960 nung agüja aliba onüktem den putepa, State of Nagaland Act’ 1962 nung temelenshi kar asütsü atema Nagaland Legislative Assembly-i Resolution ka yangluang ta UNTABA-i takhangba agütsür saka ibaji tang tashi meinyak lir, ta parnokisa shisem.
Tang Nagaland nung sorkar tasen tentetba nung lennir teimbaka memelenshii dang lir, anungji March 21, 2017 nungi Assembly Session tenzüktsü aliba nung Resolution ji benoka agizüktsü aser ibaji ajanga Nagaland o Assam sorkartem tsüngda arrtsü ken o bentettsü ayongzüker, ta UNTABA-isa metetdaktsü.