UNTABA-i NNPGs indang Working Committee den ajurutep

Dimapur, October 22 (TYO): United Naga Tribes Association on Border Areas (UNTABA) nung Advisors, Executive Committee Members, Action Committee Members, Dimapur District GBs Association aser Border Areas nungi tanishirtem telok kati October 22, 2017 nü National Political Groups 6 indang Working Committee den ajurutepa senden ka amen.
Dimapur nung amenba senden nung Nagaland aser Assam tsüngda arrtsü tebilemtsü aser Assam nung aliba Naga nunger lushi tang aliba Nagaland state ket nung agütsütsü indang onüktem benoka olemtep.
Iba onük ya putiotsü indang kulitem aser official documents nung ajemdaker yimten jenjang nungang lemtettsüla ta tanü senden nung lemsatep.
Naga nunger ajangzüktsü mechi nung NNPGs trok tashi sabang ka nung longjemba atema UNTABA-i Working Committee dang pelaba metetdaktsü aser India sorkar den yimten ken o lemtepba nung yariteptsü nangzük, ta UNTABA sangdong ka nung metetdaktsü.
Nübortemi arrtsü indang ola adokba angatsü atema Working Committee-i mapang agütsüba atema kanga pelar, UNTABA-isa shisem.