UNTABA-i Rilan yimtsüng nung ‘Disapur’ yim kümtetba aitsür Nagaland sorkar aser Dimapur administration-i mapa inyaktsü akhanger

Dimapur, August 12 (TYO) : Rilan yimtsüng telung nung Karbi Anglong aser Diphu administration nati Disapur yimtsüng kümtetba kukua aitsür, ta (United Naga Tribes Association of Border Areas) UNTABA-i sangdong ka nung metetdaktsü.
Assam tsütsü nungi arrtsülen aliba administrative ketdangsertemi tashiyim amshiba ajanga nisung taküm aika laluogo aser arrtsülen alirtem tsüngda mepetmesü aika adokdaktsüogo, ta UNTABA Chairman, Hukavi T. Yeputhomi aser General Secretary, Imsumongba Pongen nati sangdong nung shia lir.
Rilan yimtsüng telungtet nung ‘Disapur’ ta ser yim tasen kümtetbaji Dimapur District administration aser Nagaland sorkar nati teinyaktsü mapa meinyakba ajanga lir. Iba onük atema aiben district ketdangsertem den Home Minister aser Chief Minister dangi osang yokogo saka parnoki Assam ketdangsertem dang kecha meshitet, ta UNTABA-i sangdong nungsa shia lir.
Daldali aser Dhansiri Reserve Forests telung nung ozüng anema kümtetba yimtem indang osang tejangja UNTABA-i administration nem agütsüogo saka parnoki item asoshi kecha meinyak, ta UNTABA-isa ashi.
Ozüng anema kümtetba yimtemji 1) Nowgong, 2) Notunbosti, 3) Khukhribosti, 4) Disapur, 5) Doraibari, 6) Jarunalla, 7) Dikrongsa, 8) Hosilik, 9) Kuchunalla, aser 10) Choikilo (6 Mile) nungertem lir.
Tashishitsü aketba kin balala nungi nisungtemi tashiyim amshia Naga nunger lushi atsünga agiba ya Naga nunger asoshi khuret tulu lir aser tanü asenoki iba khuret atema inyaktsüla aji mesüra, tarutsü nung timtem tulu ajurutsü, ta UNTABA-isa ashi.
Assam aser Nagaland tsüngda kilometer 512 arrtsüa aliba tesem ajunga nung tashishitsü aketba nisungtemi Naga nunger lushi atsünga agia lir saka item arrtsü anasa aliba Nagaland state ketdangsertemi itemji mangur. Item ketdangsertem yagi parnoki inyaktsü lemzükba mapa meinyaker aser iba khuret ajanga tarutsü nung timtem bener arutsütsü aliba atema mebilemdanger, ta UNTABA-isa sangdong nung metetdaktsü.
Assam nung arrtsülen aliba ketdangsertemi temelaba agüja Assam nungi tashishitsü aketertemi Naga nunger lushi atsünga agiba inyakyim atema Nagaland ketdangsertemi kecha meinyakra, kodamasüba tensa ajurudang parnoki iba tebilemtsü khuret abentsü, ta UNTABA-isa amokmerena metetdaktsü.