UNTABA teloki NSCN/GPRN Ato kilonser Muivah ajuru

New Delhi nung UNTABA teloki NSCN-IM lenir Th.Muivah ajurua noksa tangokba yangi angur.

Dimapur, March 03 (TYO) : Naga nunger lushi tang Assam kübok aliba ya tanaben agutettsü asoshi telemtetba agidaktsünüa tezüluba nung United Naga Tribes Association on Border Areas (UNTABA) teloki NSCN/GPRN Ato Kilonser, Th. Muivah ajurua agütsüogo.
Naga nunger temetentem indang jembidang, akhidang India den renemba onüktem Nine Point aser Sixteen Point Agreements ama nung Naga nunger temetentem tejangja shia lir, anungji India den Naga yimten latettsü asoshi jembidang, item onüktemji enoksema jembitsüla ta parnokisa metetdaktsü.
Iba ken o benoka jembidang, NSCN-IM leniri ken o kanga junga angaa liasü aser Naga nunger temetenji wazüka ayutsüsa India den jembitsü ta metetdaktsü. Iba ama temeten aser tebilemtsüji India sorkari kanga junga angateta lir ta paisa ashi.
UNTABA lenirtemisa kasa onük nung India tenüng nung Naga nunger den jembitsü shimba nisung R.N.Ravi ajanga India ato kilonser nema tezüluba nem agütsü.
Parnokisa Lok sabha MP Nephiu Rio den ajurua kasa tebilemtsü onük süoka jembia liasü.