UP assembly election nung BJP kijai tokteptsü: Mahesh Sharma

New Delhi, May 29 (Agencies): 2014 Lok Sabha election mapang Uttar Pradesh nung Union Minister, Mahesh Sharma-i tongtibang shilem agia BJP-i takok ngua liasü aser tanü pai, taruba Uttar Pradesh Assembly election nung BJP-i Ram tekülem ki onük ama mangatettep onük mebenoktsü ajisüaka Ato kilonser, Narendra Modi’er sorkari terenlok agütsütsü onük nung tokteptsü, ta metetdaktsü.
Paisa, state nung election matongdang mesüra election agiba sülen party-i tanga party den melokteptsü, ta ashi.
Assembly menden 403 nungi BJP-i menden 265 dak tema nung takok angutsü, ta Minister of State (Independent Charge) for Culture & Tourism and Civil Aviation, Sharma-isa ashi.
UP nung Lok Sabha election mapang party atema kanga meranga inyakba ajanga Sharma nem minister menden agüja liasü aser pai, election nüboyimba mapang BJP-i Ram tekülem ki onük masü saka terenlok, junga yimsüsüba aser ochimashi atsütoktsü onüktem nung nüboyimtsü, ta ashi.
“Ram tekülem ki onükji yimtenren onük ka mekümdaktsüner,” ta paisa ashi.
“Tamangba tsütsü nisung million aikati Ram tekülem ki yangludaktsüner. Onoki iba ya yimtenren onük ka mekümdaktsüner. Onok yimtenren onük nung ibaji mali. Ajisüaka iba linük nüburtemi Ayodhya nung Ram tekülem ki ka yangludaktsüner,” ta pai ashi.
Tawa Assam assembly election nung BJP-i takok tulu anguba sülen Sharma-i, yimtenren nung kanga tongtibang state ka nung mapa tulu ka koktettsüla ta party lenirtemi bilemer, ajisüaka election matongdang mesüra election agir-a party shinga dena melokteptsü, ta ashi.
2014 küm UP nung Lok Sabha menden 80 nungi BJP-i menden 71 tashi nung takok ngua liasü, ibayongji party-i House nung majority ngutet.
2012 küm UP Assembly election nungbo party-i menden 47 dang nguteta liasü.