UP assembly election nung BSP-i dang BJP tamakok ngudaktsütettsü: Mayawati

Lucknow, January 15 (Agencies): Deobarnü Bahujan Samaj Party (BSP) tongti, Mayawati-i, taruba Uttar Pradesh state Assembly elections nung lar party-i dang Bharatiya Janata Party tamakok ngudaktsütettsü, ta ashi.
Tanü la arishi küm 61 ajungba anogomung nung osangbenertem den jembidang lai, state assembly election nung lar party-i tanga party den meloktepi tokteptsü, ta metetdaktsü.
Kümshia la asoba anogomung nung nübur aikati benjung tulu ayongzüka amunger ajisüaka Mayawati-i la pusemertem dang, la asoba anogomung nung makamaitertem nüngdak balala atema inyakdaktsüner aser la asoba benjungmungji tongmelang agi dang mungdaktsüner, ta mepishi.
BSP lenirisa, “State nung BJP nokdangtettsü party ji BSP kija lir. State nung party sorkar tashii arura ibaji ajanga BJP jenjang majungtsü, aser Centre nung tashii melamela marutsü. BJP-i nübur telemtetbatem anema meinyaktettsü,” ta ashi.
Laisa, “2019 küm Lok Sabha election atema BJP jenjang raksatsütsü atema BSP dak tashi lir,” ta shisem.
BJP aitsüba olen ka nung Mayawati-i, BJP-i la aser Bahujan Samaj Party nem tai tongloktsür, saka ibaji ajanga lar party dang tashi itshitsü, ta ashi.
BJP mapatongtemji Rashtriya Swayamsevak Sangh onüktem ajanga ajungshiba lir ta aija lai, “Demonetisation ama schemes ya BJP den tembartem ajangzükdaktsütsü atema benokoba lir,” ta ashi.