UP assembly election nung Rahul CM candidate asütsü benoker

New Delhi, May 01 (Agencies): Election atema sentong asameyanger mongin, Prashant Kishor-i taruba Uttar Pradesh Assembly election nung Congress tatong Tir, Rahul Gandhi Chief minister candidate asütsüla, ta benokogo.
Congress telung osang ka ajanga ashiba agi, 2019 küm Lok Sabha election nung Congress sorkar tashii arutsü lenmangji, nüburtemi Rahul Gandhi dang tamang katettsüla, aser ibaji Uttar Pradesh election nung tendangtsüla ta Kishor-i shiogo.
Rahul Gandhi-i ibaji memulungra Priyanka Gandhi shimtsü, ajisüaka tenapronglai memulungra Kishor-i taoba Delhi Chief Minister, Sheila Dikshit tenüng benoktsüa akok.
Osang ajanga angazükba agi, Prashant Kishor-i benokba onüktemji Rahul-i angadangogo, ajisüaka iba atemaji shisadanga telemtetba agitsü atema pai anogo ishika meshiogo.
Uttar Pradesh nung Congress lenirtemibo CM candidate tenüng mesangdongi toktepner, ajisüaka Kishore-ibo CM candidate ji sangdongtsüla, ta ashir.
Bihar state nungi Prashant Kishor ajanga Narendra Modi Gujarat CM aliba nungi Ato kilonser kümdaktsü, iba den külemi pa ajanga Nitish Kumar-i 2015 Bihar assembly election nung takok tulu ngudaktsüba sülen nungi nisung aikati pa ya election sentong asameyanger mongin ka ta züngshir.