New Delhi, August 17 (Agencies): Taruba anogo pezünü Himalaya tenemtsüng nung tzünglu kanga sashia arutsüa akok, aser ibaji ajanga Uttar Pradesh, Bihar, Assam aser West Bengal state tem dang tzümetsüng lendong atema renema alitsü aser kümdanga alitsü metetdaktsüogo.
India Meteorological Department’s (IMD) Director General, Laxman Singh Rathore-i, Himalaya tenemtsünglen ‘monsoon trough’ ka ajanga tzünglu kanga sashia arutsü akok, ta sangdong ka ajanga metetdaktsü.
“Tzünglu arubaji ajanga Kosi, Gandak aser Ghaghara ayongtem, Ganga aser Brahmaputra ayong nung yimokba ayongtem ajak nung tzü metsüngtsü,” ta IMD ketdangser-isa ashi.
National Disaster Management Authority (NDMA)-i ayonga High level senden ka amenba sülen Rathore-i, “Iba ya ajanga East Uttar Pradesh, Bihar, Assam aser West Bengal nung sub-Himalayan tesemtem nung tzümetsüngtsü,” ta ashi.
Iba senden nungji Central Water Commission züngsemtem aser item state ajak nungi resident commissioner tem denogo.
Rathore-i ashiba agi, tzümetsüng agi kongshitsü aliba state tem dang agency tem den osangtsüsang agitepa alitsü metetdaktsüogo.
UP, Bihar, W B & Assam nung tzümetsüng lendong sangdonger added by asungba on
View all posts by asungba →
You must be logged in to post a comment Login