UP: Block level office ajak nung biometric attendance atema tuyu

Lucknow, April 23 (Agencies): Sorkar mapa inyaker ajak mapang shitak nung mapai arutsü atema Uttar Pradesh Chief Minister, Yogi Adityanath-i block level tashi nung office ajak nung biometric attendance system amshitsü atema tetuyuba ka agütsüogo.
Honibar aonung tesü Rural Development department ketdangsertem den senden ka amendang chief minister-i iba telemtetba agi.
“Block level tashi nung biometric system inokang. Iba dak alia village panchayat ajak nung osang metetdaktsüba board ka yuang, aser iba nungji village Pradhan den tongteprateptsü number aser tang teinyakdak mapatem indang metetdakjang,” ta Adityanath-i tuyuogo, ta ketdangsertem sangdong ka ajanga metetdaktsü.
Mahatma Gandhi National Rural Employment Guarantee scheme (MNREGS) mapatong ochishia inyaktsü nükjidong nung Adityanath-i, mapa inyakertemji Aadhaar-based payment system den sendakteptsüla, ta ashi.
Iba senden nung Chief minister-isa National Rural Drinking Water Programme, World Bank-i yariba ‘Neer Nirmal’ aser Rajya Grameen Payjal Yojana scheme tem osang metetpelaa liasü.
“Bundelkhand nung dang masü saka state nung tanüngba tesemtem nunga tzü supply schemes tenzüktsüla,” ta pai ashi.
Tzü supply atema district 31 nung tzü supply schemes 160 tenzüktsüla, ta paisa shisem.
Ano Rural Development department-a Samagra Gram Vikas Department den sendakteptsü atema pai tetuyuba agütsü.