UP CM Akhilesh-i minister 8 anentsüogo

New Delhi, October 29 (Agencies): Tan Honibar Uttar Pradesh Cabinet menden melentepshitsü lia tanü Chief Minister, Akhilesh Yadav-i par cabinet minister 8 anentsüogo aser tanga minister 9 nungi portfolio agienogo.
Tanü anentsüba Minister 8 rongnung Cabinet minister pongu aser Ministers of State (MoS) asem lir.
State cabinet nungi anentsüba minister temji- Shiv Kumar Beria, Bhagwat Sharan Gangwar, Ambika Chowdhary, Aridaman Singh, Alok Kumar Shakya, Yogesh Pratap Singh, Shivakant Ojha aser Narad Rai nunger lir.
Ano portfolio agienba minister tem rongnung Raguhraj Pratap Singh (Raja Bhaiyya), Avdhesh Prasad aser Ahmad Hasan nunger lir.
Item minister tem yagi mapa junga bener moutetba ajanga cabinet nungi anentsüogo, ta osang angazüker.
October 31 anepdang 10:30 ako nung Raj Bhavan, Lucknow nung minister tasenpurtem tenangzükba agitsü.
Chief minister Akhilesh den kanga atongsema inyakertemi ashiba agi, Honibar nü tenangzükba agiba nungji “aika ajangshia aliba lanurtem alitsü.”
Bodhbar aonung tesü Akhilesh Yadav-i state Angh, Ram Naik jaoka par Cabinet ulushitsü atema shisa lemsatepa liasü.
Tamalen Akhilesh-i, Bihar assembly election tembangba sülen par cabinet menden melenteptsü ta metetdakja liasü.
Uttar Pradesh nung Council of Minsiter tashiji züngsem 60 tashi tang mela-a lir. Tang UP nung CM densema cabinet minister 26, ministers of state 24 aser ministers of state (independent charge) 4 lir.
Samajwadi Party tongti lenir, Mulayam Singh Yadav-i aiben minister kar dang parnok yimya melenshiang, mesüra Cabinet nungi anentsütsü ta shia liasü.
“2017 Vidhan Sabha election nung Party-i takok angutsü atema minister karbo anentsütsüsa akumtsü,” ta paisa tamalen jembia liasü.