UP CM-i Shivpal den minister 3 anentsü

Lucknow, October 23, 2016: Deobarnü Lucknow nung Uttar Pradesh Chief Minister, Akhilesh Yadav’er kima  pa pusemertemi Samajwadi Party general secretary, Amar Singh anema longkak aitba noksa nung angur.

Lucknow, October 23 (Agencies): Uttar Pradesh nung assembly election agitsü mapang ana nung lia tanü Chief Minister, Akhilesh Yadav-i pa tebu tanubo Shivpal Yadav aser minister asem par Cabinet nungi anentsüogo, ta osang ka ajanga metetdaktsü.
Minister temji Omprakash Singh, Shadab Fatima aser Narad Rai nunger lir.
Iba senden nung adener MLA temi ashiba agi, Akhilesh-i, Amar Singh den tesentaktep tajung alirtembo par sorkar nung shilem mali, ta shiogo.
Shivpal Yadav ya tawa Samajwadi Party dangi meyipsang Amar Singh den tesentaktep junga lir.
Tanüsa SP Tir, Mulayam Singh Yadav-ia National general secretary, Ram Gopal Yadav party nungi anentsü, kechiyong pai Akhilesh pusem.
Mulayam Singh ajuruba sülen osangbenertem den jembidang Shivpal-i, iba ya party tashimait kümdaktsütsü merangba lir, ta aitsü.
“Ram Gopal-i CBI ken o paidoktsü atema onok ashioktsü; pai party tenüng menüktsütsü merang. Pa ochimashirtem den tesentaktep lir. Ram Gopal-i  tim masüba nung Netaji tenüng teti tetshia aruogo, aser ni ibaji party sabang aika nungi jembiogo,” ta Shivpal-i ashi.
Tang SP telung nung telemsa tulu adoka lir, koba ajanga election matongdang parnok lemdangtsüa akok.
Taoba ita Akhilesh tebu aser SP tongti, Mulayam Singh-i party tir Akhilesh melen  Shivpal shimba mapang nungi party telung nung mepetmesü adok, koba ajanga pa adianu aser par jabaso na tsüngda tali tsükchitepdaktsü. Akhilesh-i tebui lemtetbaji agizüktsüsa akum, ajisüaka iba telemsa adokba atema pai Amar Singh nem tai tongloktsü.