Lucknow, January 15 (Agencies): 2017 küm Uttar Pradesh nung assembly election agitsü aliba nung rangloker BJP-i Ram tekülem ki onük kakteta jembir, ta aija tanü BSP tongti lenir Mayawati-i Delhi aser Bihar na nung atalokba ama state nung vote agütsütsüpurtemi Ato kilonser tasa nung masongtsü, ta ashi.
Taoba mapang UP Chief Minister Mayawati tanü arishi küm 60 ajungba anogomung nung lai, “Centre sorkari communal forces tem nem sadema inyaktsü lenmang lapoktsüogo, koba ajanga linük nung mepetmesü adoker,” ta ashi.
“UP assembly election mapang ana nung aliba ajanga BJP, RSS aser tanga tentettemi Supreme Court nung anendaka aliba, Ram tekülem ki onük kakteta jembir. Vote angutsü mechi nung tamangba yimsü benokba ajanga takok mangutsü. Vote agütsütsüpurtemi kanga kümdangtsüla,” ta Mayawati-i Lucknow nung osangbenertem dang ashi.
“UP election mapang ana nung aliba ajanga state khenyongi sentoka alisang Ato kilonser Narendra Modi-i tangbo terenlok atema jembir,” ta lai ashi.
“Delhi aser Bihar na nung inyakba ama pai (Modi) ‘natak’ tenzükogo, saka yangi aliba nüburtem pa sang nung mashitsü aser UP election nunga BJP-i tamakok angutsü,” ta lai ashi.
You must be logged in to post a comment Login